جسٹس مسیح کا کشمیر دورہ، سیکیورٹی انتظامات اور سیاحت کی بحالی کے اقدامات کوسراہا

عظمیٰ ویب ڈیسک
سرینگر/سپریم کورٹ آف انڈیا کے جج جسٹس مسیح نے حال ہی میں اپنے اہل خانہ کے ہمراہ جموں و کشمیر کا نجی دورہ کیا، جس دوران انہوں نے گلمرگ، پہلگام کی بائسرن روڈ، دچی گام نیشنل پارک، سرینگر کے بازاروں اور ڈل جھیل جیسے اہم مقامات کی سیر کی۔
دورے کے بعد اپنے خیالات کا اظہار کرتے ہوئے جسٹس موصوف نے کہا، ’’کشمیر بے مثال خوبصورتی اور مہمان نوازی کی سرزمین ہے۔ میرے اہل خانہ اور میں نہ صرف دل سے خوش آمدید محسوس کر رہے تھے بلکہ ہم پورے دورے کے دوران مکمل طور پر محفوظ بھی رہے۔ یہاں کے مناظر جتنے پُرسکون ہیں، سیکیورٹی فورسز کی پیشہ ورانہ مہارت بھی اتنی ہی قابلِ تعریف ہے۔
انہوں نے وادی میں سیاحوں کی واپسی کو بھی خوش آئند قرار دیا۔
انھوں نے کہا ’’یہ دیکھ کر خوشی ہوئی کہ سیاح دوبارہ کشمیر کا رخ کر رہے ہیں۔ ان کی موجودگی اس بات کی عکاس ہے کہ یہاں کی مہمان نوازی اور سلامتی پر اعتماد بحال ہو چکا ہے۔‘‘
جسٹس مسیح کے یہ تاثرات کشمیر کو ایک پرامن اور پُرکشش سیاحتی مقام کے طور پر ابھارتے بیانیے میں اہم اضافہ ہیں، جہاں اب معزز شخصیات اور سیاح کثرت سے آ رہے ہیںـ