جموں و کشمیر قانون ساز اسمبلی نے بزنس ایڈوائزری کمیٹی کی رپورٹ منظور کر لی

عظمیٰ ویب ڈیسک
سرینگر/جموں و کشمیر قانون ساز اسمبلی نے آج متفقہ طور پر بزنس ایڈوائزری کمیٹی (بی اے سی) کی سفارشات کو منظور کر لیا، جو ایوان کے کاروباری شیڈول سے متعلق ہیں۔ اسمبلی کے رکن مبار ک گل نے یہ تحریک پیش کی، جسے اسپیکر ایڈوکیٹ عبد الرحیم راتھرنے ایوان میں ووٹنگ کے لیے پیش کیا۔ ایوان کے تمام اراکین نے اس رپورٹ کو متفقہ طور پر منظور کر لیا۔
بی اے سی کی سفارشات کے مطابق، ایوان کی نشستیں 17، 22 اور 24 مارچ 2025 کو صبح 10 بجے شروع ہوں گی اور شام 5 بجے تک جاری رہیں گی، جبکہ دوپہر 1:30 بجے سے 2:30 بجے تک ایک گھنٹے کا وقفہ ہوگا۔ علاوہ ازیں  حکومت کے کاروباری امور، جو پہلے 11 اپریل 2025 کو طے تھے، انہیں 25 مارچ 2025 کو منتقل کر دیا گیا ہے۔
ایوان کی کارروائی کو ہموار بنانے کے لیے، بی اے سی نے فیصلہ کیا ہے کہ اگر وزراء مطالباتِ زر کے جوابات تحریری طور پر پڑھ کر سناتے ہیں تو وہ جوابات ایوان کے تمام اراکین میں بھی تقسیم کیے جائیں گے۔
اسمبلی میں نظم و ضبط کو یقینی بنانے پر زور دیتے ہوئے، اسپیکر عبد الرحیم راتھر نے پارٹی لیڈران اور چیف وِپس سے کہا کہ وہ اراکین کو ایوان میں نظم و ضبط اور شائستگی برقرار رکھنے کی ہدایت کریں۔ بی اے سی رپورٹ میں شامل نظرثانی شدہ قانون سازی کا کیلنڈر بھی متفقہ طور پر منظور کر لیا گیا ہے۔