ڈی آئی جی راجوری پونچھ رینج کا ایل او سی کے اگلے علاقوں کا دورہ، سکیورٹی انتظامات اور آپریشنل تیاریوں کا لیاجائزہ

عشرت حسین بٹ
پونچھ/ڈی آئی جی راجوری-پونچھ رینج، سندیپ وزیر نے ایڈیشنل ایس پی پونچھ ڈاکٹر اجے شرما اور ڈی ایس پی ہیڈکوارٹر پونچھ نیرج شرما کے ہمراہ ضلع پونچھ کے مختلف علاقوں کا دورہ کرکے موجودہ سکیورٹی صورتحال اور آپریشنل تیاریوں کا جائزہ لیا۔
دورے کے دوران ڈی آئی جی نے لائن آف کنٹرول (ایل او سی) کے اگلے علاقوں سوجیاں اور انگن پتھری کا بھی معائنہ کیا، جہاں انہوں نے مجموعی سکیورٹی صورتحال اور آپریشنل تیاریوں کا تفصیلی جائزہ لیا۔ اس موقع پر انہوں نے سرحدی علاقوں میں تعینات پولیس اہلکاروں سے ملاقات کی اور کسی بھی ہنگامی صورتحال سے نمٹنے کے لیے کیے گئے انتظامات کا معائنہ کیا۔
ڈی آئی جی نے سرحدی پٹی کی اسٹریٹجک اہمیت کو اجاگر کرتے ہوئے اہلکاروں کو ہدایت دی کہ وہ ہر وقت چوکس رہیں، نگرانی کے نظام کو مزید مضبوط بنائیں اور علاقے میں تعینات تمام سکیورٹی ایجنسیوں کے ساتھ قریبی تال میل برقرار رکھیں۔ انہوں نے دشوار گزار حالات میں خدمات انجام دینے والے اہلکاروں کی لگن اور فرض شناسی کو سراہتے ہوئے انہیں پیشہ ورانہ انداز اور عزم کے ساتھ اپنی ذمہ داریاں نبھانے کی تلقین کی۔
دورے کے دوران ڈی آئی جی نے مختلف مذہبی مقامات پر سکیورٹی انتظامات کا بھی جائزہ لیا اور ان کے تحفظ کے لیے اختیار کیے گئے اقدامات کا معائنہ کیا۔ انہوں نے پولیس اور دیگر سکیورٹی ایجنسیوں کے افسران سے ملاقات کرتے ہوئے عبادت گاہوں کی حفاظت کے لیے مسلسل نگرانی، باقاعدہ سکیورٹی جائزوں اور مؤثر احتیاطی اقدامات کی ضرورت پر زور دیا۔
اس موقع پر انہوں نے پولیس اور دیگر سکیورٹی اداروں کے افسران کے ساتھ ضلع کی مجموعی سکیورٹی صورتحال پر تبادلہ خیال کیا اور امن و امان برقرار رکھنے کے لیے مؤثر رابطے، معلومات کے تبادلے اور مشترکہ حکمت عملی کی اہمیت کو اجاگر کیا۔
ڈی آئی جی نے مختصراً ولیج ڈیفنس گارڈز (VDGs) کے اراکین اور اقلیتی برادری کے نمائندوں سے بھی ملاقات کی اور علاقے میں امن و بھائی چارے کے فروغ کے لیے ان کے تعاون کو سراہا۔
یہ دورہ ضلع پولیس پونچھ کے اس عزم کی عکاسی کرتا ہے کہ سرحدی سکیورٹی کو مزید مستحکم بنایا جائے، آپریشنل تیاریوں کو بہتر کیا جائے اور ضلع بھر میں امن و استحکام کو یقینی بنایا جائے۔