وزارت داخلہ نے مردم شماری کے لیے نوٹیفکیشن جاری کیا

عظمیٰ ویب ڈیسک
نئی دہلی/حکومت نے ملک میں آئندہ مردم شماری کے کے لیے نوٹیفکیشن جاری کر دیا ہے۔مرکزی وزارت داخلہ کی جانب سے پیر کو جاری کردہ نوٹیفکیشن میں کہا گیا ہے کہ جموں و کشمیر، اتراکھنڈ، لداخ اور ہماچل پردیش کو چھوڑ کر پورے ملک میں مردم شماری کی ریفرنس تاریخ یکم مارچ 2027 ہوگی، جبکہ برفباری سے متاثرہ جموں و کشمیر، اتراکھنڈ، لداخ اور ہماچل پردیش میں ریفرنس تاریخ یکم اکتوبر 2026 ہوگی۔ اس بار مردم شماری میں ذات پر مبنی گنتی بھی کی جائے گی۔
قابل ذکر ہے کہ وزیر داخلہ امت شاہ نے نوٹیفکیشن جاری ہونے سے ایک روز قبل اتوار کو مرکزی داخلہ سیکریٹری، رجسٹرار جنرل اور مردم شماری کمشنر اور دیگر سینئر حکام کے ساتھ آئندہ مردم شماری کی تیاریوں کا جائزہ لیا تھا۔
وزارت داخلہ کے مطابق مردم شماری دو مراحل میں کی جائے گی۔ پہلے مرحلے یعنی گھروں کی فہرست تیار کرنے کے آپریشن (ایچ ایل او) میں ہر گھر کی رہائشی حیثیت ، جائیداد اور سہولیات کی تفصیل جمع کیا جائے گا۔ اس کے بعد، دوسرے مرحلے یعنی آبادی کی گنتی (پی ای) میں ہر گھر میں ہر فرد کی آبادیاتی ، سماجی-اقتصادی، ثقافتی اور دیگر معلومات جمع کی جائیں گی۔ مردم شماری کی سرگرمیوں کے لیے تقریباً 34 لاکھ شمارکنندگان اور سپروائزرس اور تقریباً ایک لاکھ 30 ہزار مردم شماری کے عہدیداران تعینات کیے جائیں گے۔ یہ مردم شماری شروع سے اب تک کی 16ویں اور آزادی کے بعد کی 8ویں مردم شماری ہے۔
آئندہ مردم شماری موبائل ایپلی کیشن کا استعمال کرتے ہوئے ڈیجیٹل طریقے سے کی جائے گی۔ لوگوں کے لیے از خود گنتی کا انتظام بھی کیا جائے گا۔ ڈیٹا کی حفاظت کو یقینی بنانے کے لیے اسے جمع کرنے ، ترسیل اور ذخیرہ کے وقت انتہائی سخت ڈیٹا سکیورٹی اقدامات نافذ کیے جائیں گے۔