عظمیٰ ویب ڈیسک
سری نگر/منشیات کی بیخ کنی کو یقینی بنانے کے لئے جنگ کو جاری رکھتے ہوئے پولیس نے جنوبی کشمیر کے اننت ناگ ضلع میں ایک بدنام زمانہ منشیات فروش کے خلاف پریوینشن آف ایلسیٹ ٹریفک ان نارکوٹکس ڈرگس اینڈ سائیکوٹروپک سبسٹنس ایکٹ (پی آئی ٹی این ڈی پی ایس) کے تحت مقدمہ درج کیا ہے۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ اشفاق احمد میر ولد شوکت احمد میر ساکن سرہامہ سری گفوارہ نامی ملزم کو منشیات فروشی میں ملوث پایا گیا جو لوگوں کے صحت و تحفظ کے لئے خطرناک ثابت ہو رہا تھا۔انہوں نے کہا کہ مکمل تحقیقات اور ثبوت حاصل کرنے کے بعد مجاز اتھارٹی سے پی آئی ٹی این ڈی پی ایس ایکٹ کے تحت اس کو حراست میں رکھنے کی اجازت حاصل کی گئی۔
بیان میں کہا گیا کہ تمام قانونی لوازمات کی ادائیگی کے بعد ملزم کو کوٹ بلوال جموں میں بند رکھا گیا تاکہ وہ غیر قانونی سرگرمیوں کو جاری رکھنے سے باز رہ سکے۔انہوں نے کہا کہ اننت ناگ پولیس منشیات کی وبا کو ختم کرنے کے لئے پر عزم ہے اور لوگوں سے اس ضمن میں تعاون کرنے کی اپیل کرتی ہے۔
اننت ناگ میں بدنام زمانہ منشیات فروش کے خلاف پی آئی ٹی این ڈی پی ایس ایکٹ کے تحت مقدمہ درج:پولیس
