سری نگر میں دریائے جہلم کی سطح خطرے کے نشان سے نیچے، انتظامیہ الرٹ؛ جنوبی کشمیر اور جموں کے کئی علاقوں میں موسلادھار بارش، فلیش فلڈ کا خدشہ برقرار

عظمیٰ ویب ڈیسک
سری نگر/دریائے جہلم میں پانی کی سطح جمعہ کو سری نگر سمیت اہم گیج اسٹیشنوں پر مسلسل کم ہوتی رہی، جس سے گزشتہ روز سری نگر میں سیلابی اعلان کی حد عبور ہونے کے بعد کچھ راحت ضرور ملی، تاہم مزید بارشوں کی پیش گوئی کے پیش نظر انتظامیہ نے ہائی الرٹ برقرار رکھا ہے۔آبپاشی و فلڈ کنٹرول (I&FC) محکمہ کے تازہ ترین اعداد و شمارکے مطابق رام منشی باغ میں پانی کی سطح 19.07 فٹ ریکارڈ کی گئی، جو مسلسل کم ہو رہی ہے اور سیلابی اعلان کی حد 21 فٹ سے کافی نیچے ہے۔اعداد و شمار کے مطابق سنگم میں پانی کی سطح 18.89 فٹ جبکہ پانپور میں 5.13 میٹر ریکارڈ کی گئی، اور ان دونوں مقامات پر بھی پانی کی سطح میں مسلسل کمی دیکھی گئی۔
بالائی علاقوں میں آشام اور ولر میں پانی کی سطح میں معمولی اضافہ ریکارڈ کیا گیا، تاہم دونوں مقامات پر سطح اب بھی سیلابی اعلان کی مقررہ حد سے نیچے ہے۔دریائے جہلم کی معاون ندیوں میں ویشو نالہ میں پانی کی سطح بڑھ رہی ہے، جبکہ رمبی آرا اور دریائے سندھ میں کمی کا رجحان دیکھا گیا۔ لدر اور دودھ گنگا میں پانی کی سطح مجموعی طور پر مستحکم رہی۔
محکمہ آبپاشی و فلڈ کنٹرول صورتحال پر مسلسل نظر رکھے ہوئے ہے، جبکہ انتظامیہ نے خصوصاً دریا کے کناروں اور حفاظتی بندوں کے قریب رہنے والے لوگوں کو محتاط رہنے اور سرکاری ہدایات پر سختی سے عمل کرنے کی ہدایت دی ہے۔
ادھر آزاد موسمیاتی تجزیہ کار فیضان عارف کینگ نے بتایا کہ جمعہ کے روز جموں خطے کے مختلف علاقوں، خصوصاً چناب ویلی، ادھم پور، جموں، سانبہ اور کٹھوعہ میں بارش کا سلسلہ جاری رہنے کا امکان ہے۔انہوں نے کہا کہ وادی کشمیر میں جنوبی کشمیر بارشوں سے سب سے زیادہ متاثر ہو سکتا ہے۔ان کے مطابق بیشتر علاقوں میں ہلکی سے درمیانی درجے کی بارش متوقع ہے، جبکہ چند مقامات پر موسلادھار بارش بھی ہو سکتی ہے۔
فیضان کینگ نے کہا کہ بارش کا سلسلہ دوپہر تک جاری رہنے کے بعد بتدریج کم ہو جائے گا، تاہم شام تک بعض علاقوں میں وقفے وقفے سے بارش جاری رہ سکتی ہے۔انہوں نے خبردار کیا کہ کہیں کہیں شدید بارش بھی ہو سکتی ہے، اس لیے فلیش فلڈ (اچانک سیلاب) کا خطرہ بدستور برقرار رہے گا۔