کشمیر کی موجودہ صورتحال کا جائزہ لینا کمیٹی کے دائرۂ کار میں نہیں: تھرور

عظمیٰ ویب ڈیسک
جموں/پارلیمانی قائمہ کمیٹی برائے امورِ خارجہ کے چیئرمین ششی تھرور نے پیر کے روز کہا کہ کمیٹی کا جموں و کشمیر کا موجودہ دورہ صرف بھارت-پاکستان تعلقات، بھارت-چین تعلقات اور پاسپورٹ دفاتر و خدمات کے جائزے تک محدود ہے، جبکہ وادی کشمیر کی مجموعی صورتحال کا جائزہ لینا اس دورے کا مقصد نہیں ہے۔
جموں میں نامہ نگاروں سے گفتگو کرتے ہوئے ششی تھرور نے واضح کیا کہ کمیٹی جموں و کشمیر میں مقامی حالات یا داخلی معاملات کا جائزہ لینے نہیں آئی ہے۔
انہوں نے کہا، “میں نے ابھی لیفٹیننٹ گورنر سے ملاقات کی ہے اور مجھے ابھی دیگر معاملات دیکھنے یا مختلف لوگوں کی آراء سننے کا موقع نہیں ملا۔ میں یہ بات بالکل واضح کرنا چاہتا ہوں کہ یہ دورہ کشمیر وادی کے حالات کا جائزہ لینے کے لیے نہیں ہے۔
تھرور نے مزید کہا، کمیٹی یہاں تین امور کا مطالعہ کرنے آئی ہے، جن میں بھارت-پاکستان تعلقات، بھارت-چین تعلقات اور پاسپورٹ دفاتر و پاسپورٹ خدمات کی کارکردگی شامل ہیں۔ یہی تین موضوعات ہمارے زیرِ غور ہیں۔ ہم یہاں داخلی معاملات کا جائزہ لینے نہیں آئے اور نہ ہی یہ ہمارا دائرۂ کار ہے، کیونکہ ہم امورِ خارجہ کی کمیٹی ہیں۔
قابلِ ذکر ہے کہ پارلیمانی قائمہ کمیٹی برائے امورِ خارجہ بھارت کی خارجہ پالیسی، سفارتی سرگرمیوں اور وزارتِ خارجہ سے متعلق امور کا جائزہ لینے کی ذمہ دار ہے۔
کمیٹی اس وقت جموں و کشمیر کے دورے پر ہے، جہاں وہ پڑوسی ممالک کے ساتھ بھارت کے تعلقات اور خطے میں پاسپورٹ خدمات کی فراہمی سے متعلق معاملات کا جائزہ لے رہی ہے۔