ایجنسیز
یروشلم// ایک معروف اسرائیلی اسلحہ ساز کمپنی اسرائیل ویپن انڈسٹریز نے ‘میک ان انڈیا’ مہم کے تحت ٹیکنالوجی کی منتقلی کے ساتھ بھارت کو لائٹ مشین گنز کی پہلی کھیپ فراہم کر دی ہے۔کمپنی کے مطابق، 2,000 NEGEV 7.62×51 LMG پر مشتمل پہلی کھیپ گزشتہ ہفتے کے اختتام پر فراہم کی گئی، جو مجموعی طور پر 41,000 یونٹس کے معاہدے کا حصہ ہے۔ مزید 4,000 ہتھیار اسی سال کے دوران فراہم کیے جائیں گے۔یہ ترسیل پی ایل آر سسٹم کے ذریعے کی گئی، جواڈانی گروپ اور آئی ڈبلیو آئی کا مشترکہ منصوبہ ہے، اور بھارت میں نجی شعبے کی پہلی کمپنی ہے جو چھوٹے ہتھیار اور گولہ بارود تیار کر رہی ہے۔
کمپنی کے بیان میں کہا گیا ہے کہ یہ پیش رفت ‘میک ان انڈیا’ اقدام کے تحت ٹیکنالوجی کی کامیاب منتقلی کے بعد ممکن ہوئی ہے، جو بھارت کے دفاعی پیداواری نظام کو مضبوط بنانے کی کوششوں کی عکاسی کرتی ہے۔NEGEV 7.62×51 LMG اپنی کلاس میں ہلکی ترین 7.62 ملی میٹر لائٹ مشین گنز میں شمار ہوتی ہے اور اسے اسرائیل دفاعی فورسز بھی استعمال کرتی ہے۔ یہ ہتھیار سخت حالات میں قابلِ اعتماد کارکردگی، اعلیٰ درستگی اور مؤثر نشانہ بازی کی صلاحیت رکھتا ہے۔اس کا ہلکا وزن اور 7.62 ملی میٹر گولہ بارود استعمال کرنے کی صلاحیت اسے مضبوط حفاظتی رکاوٹوں کو بھی عبور کرنے کے قابل بناتی ہے، جس کے باعث یہ شہری جنگ اور حساس مشنز کے لیے موزوں ہے۔یہ ہتھیار نیم خودکار اور مکمل خودکار دونوں طریقوں سے استعمال کیا جا سکتا ہے، جبکہ اسے ہیلی کاپٹروں، گاڑیوں اور بحری پلیٹ فارمز پر بھی نصب کیا جا سکتا ہے۔مزید برآں، اس میں پکاتنی ریلز اور نائٹ ویڑن سائٹس شامل ہیں جو کم روشنی میں نشانہ لگانے کی صلاحیت کو بہتر بناتی ہیں، جبکہ نیٹو معیار کے مطابق تیاری اس کی پائیداری کو یقینی بناتی ہے۔
