شاہ نواز
ریاسی// ضلع ریاسی کے گلاب گڑھ علاقے میں بھیڑوں کی اچانک اموات کے معاملے پر مقامی سطح پر اٹھائی گئی تشویش کے بعد محکمہ شیپ ہسبنڈری کی ویٹرنری ٹیم فوری طور پر حرکت میں آ گئی اور متاثرہ مقام نہوچ (دیول زیرو موڑ) کا دورہ کیا۔ ٹیم نے موقع پر پہنچ کر متاثرہ مویشیوں کا تفصیلی طبی معائنہ کیا اور بیماری کے ممکنہ پھیلاؤ کو روکنے کیلئے ضروری اقدامات شروع کئے۔ویٹرنری ماہرین نے دیول زیرو موڑ میں ایک مقامی مویشی پالک کی رہائش گاہ کا معائنہ کیا جہاں اطلاعات کے مطابق متعدد بھیڑیں پراسرار حالات میں ہلاک ہو گئی تھیں۔ ڈاکٹروں نے باقی ماندہ مویشیوں کی صحت کا جائزہ لیتے ہوئے فوری علاج فراہم کیا اور احتیاطی ادویات بھی استعمال کیں تاکہ کسی ممکنہ وبائی بیماری کو پھیلنے سے روکا جا سکے۔
حکام کے مطابق متاثرہ جانوروں سے متعلق نمونے بھی حاصل کئے گئے ہیں، جنہیں ضرورت پڑنے پر لیبارٹری جانچ کے لئے بھیجا جائے گا تاکہ ہلاکتوں کی اصل وجہ کا سائنسی بنیادوں پر تعین کیا جا سکے۔ ویٹرنری ٹیم نے مقامی مویشی پالکوں سے ملاقات کر کے انہیں حفاظتی تدابیر، صفائی کے اصولوں اور جانوروں کی بروقت ویکسی نیشن کی اہمیت سے بھی آگاہ کیا۔ذرائع کے مطابق مقامی سطح پر مسئلے کو اجاگر کئے جانے کے بعد انتظامیہ نے فوری کارروائی کرتے ہوئے ٹیم کو علاقے میں روانہ کیا، جس سے متاثرہ خاندانوں کو کافی حد تک اطمینان حاصل ہوا۔غور طلب ہے کہ بھیڑوں کی اچانک موت کے سلسلے میں ایڈوکیٹ زاہد ملک کی طرف سے اجاگر کی گئی تشویش پر تیزی سے عمل کرتے ہوئے، بھیڑ پالنے کے محکمے کی ایک ٹیم متاثرہ مویشیوں کا معائنہ اور علاج کرنے کیلئے علاقہ میں پہنچی۔ ماہرین نے یقین دلایا کہ آئندہ چند روز تک علاقے میں مسلسل نگرانی جاری رکھی جائے گی تاکہ کسی بھی ہنگامی صورتحال سے بروقت نمٹا جا سکے۔مقامی باشندوں نے انتظامیہ اور محکمہ شیپ ہسبنڈری کے فوری ردعمل کو سراہتے ہوئے کہا کہ بروقت کارروائی سے نہ صرف مزید نقصان کو روکنے میں مدد ملے گی بلکہ مویشی پالنے پر انحصار کرنے والے غریب خاندانوں کی روزی روٹی کے تحفظ میں بھی معاونت حاصل ہوگی۔ انہوں نے مطالبہ کیا کہ گلاب گڑھ اور ملحقہ دیہات میں باقاعدہ طبی کیمپ اور ویکسی نیشن مہم جاری رکھی جائے تاکہ مستقبل میں ایسے واقعات سے بچا جا سکے۔
