عظمیٰ نیوز سروس
ریاسی //ضلع ریاسی کی سڑک پر پیش آئے ایک حادثے میں تین یاتریوں اور ایک معمر میاں بیوی سمیت پانچ افراد زخمی ہوگئے۔ یہ حادثہ ہفتہ کی شام بارہ دری پل کے قریب اس وقت پیش آیا جب ایک ٹیکسی اور کار آپس میں ٹکرا گئیں۔پولیس کے مطابق حادثہ اچانک پیش آیا جس کے نتیجے میں دونوں گاڑیوں میں سوار افراد زخمی ہوگئے۔ اطلاع ملتے ہی مقامی پولیس اور امدادی ٹیمیں موقع پر پہنچ گئیں اور زخمیوں کو فوری طور پر قریبی طبی مرکز منتقل کیا گیا جہاں ان کا علاج جاری ہے۔زخمی ہونے والے تین یاتریوں کی شناخت سمن دیوی (58)، موہت کمار (19) اور کنال کمار (27) کے طور پر ہوئی ہے، جو دہلی کے رہائشی بتائے جاتے ہیں۔ یہ تینوں ٹیکسی میں سفر کر رہے تھے اور مذہبی یاترا کے سلسلے میں علاقے میں آئے ہوئے تھے۔حادثے میں زخمی ہونے والے دیگر افراد کی شناخت لال حسین (65) اور ان کی اہلیہ بیگم جان (60) کے طور پر کی گئی ہے، جو ضلع پونچھ کی تحصیل سرنکوٹ کے رہنے والے ہیں۔ عینی شاہدین کے مطابق ٹکر کافی زور دار تھی جس کے باعث دونوں گاڑیوں کو بھی نقصان پہنچا۔پولیس حکام نے بتایا کہ حادثے میں شامل دونوں گاڑیوں کو ضبط کر لیا گیا ہے اور واقعے کی وجوہات جاننے کے لئے باضابطہ تحقیقات شروع کر دی گئی ہیں۔ ابتدائی اندازے کے مطابق حادثہ تیز رفتاری یا سڑک کی تنگی کے باعث پیش آیا ہو سکتا ہے، تاہم حتمی رپورٹ تحقیقات مکمل ہونے کے بعد سامنے آئے گی۔مقامی لوگوں نے انتظامیہ سے مطالبہ کیا ہے کہ مذکورہ پل اور سڑک پر حفاظتی اقدامات مزید سخت کیے جائیں تاکہ مستقبل میں ایسے حادثات سے بچا جا سکے۔
