انٹیلی جنس نظام مزید مضبوط بنانے اورگشت تیز کرنے پر زور
عظمیٰ نیوزسروس
جموں//جموں و کشمیر کے سرحدی اضلاع کٹھوعہ اور سانبہ میں سکیورٹی صورتحال کا جائزہ لیتے ہوئے ایک سینئر پولیس افسر نے بدھ کے روز حکام کو ہدایت دی کہ وہ غیر معمولی چوکس رہیں اور حساس علاقوں میں اضافی فورس تعینات کریں۔ ڈپٹی انسپکٹر جنرل آف پولیس جموں-سانبہ-کٹھوعہ رینج، شیو کمار شرما نے ایس ایس پی کٹھوعہ موہیتاشرما اور ایس ایس پی سانبہ ورندر منہاس کے ہمراہ ضلع کٹھوعہ کے بلاور علاقے میں سکیورٹی انتظامات کا جائزہ لیا۔ یہ دورہ اْدھمپور کے سوان علاقے میں حالیہ مسلح جھڑپ کے بعد کیا گیا، جس میں ایک پولیس اہلکار ماراگیاتھا۔ ڈی آئی جی نے امن و امان قائم رکھنے اور مختلف سکیورٹی ایجنسیوں کے درمیان قریبی تعاون کی ضرورت پر زور دیا تاکہ ابھرتے ہوئے چیلنجز کا مؤثر طور پر مقابلہ کیا جا سکے۔ انہوں نے فورسز کی تعیناتی کا جائزہ لیتے ہوئے حساس اور کمزور علاقوں میں اضافی نفری تعینات کرنے کی ہدایت دی۔ انہوں نے انٹیلی جنس معلومات کے تبادلے کو بروقت یقینی بنانے اور سکیورٹی چیکنگ و گشت کو مزید سخت کرنے پر زور دیا۔ ایس ایس پی کٹھوعہ نے انہیں بلاور علاقے کی موجودہ صورتحال اور امن و قانون قائم رکھنے کے لیے کیے گئے اقدامات سے آگاہ کیا۔ دورے کے دوران ڈی آئی جی نے فوجی حکام کے ساتھ مشترکہ اجلاس بھی منعقد کیا۔
سانبہ کے منسار علاقے میں بڑے پیمانے پر تلاشی آپریشن شروع
عظمیٰ نیوزسروس
جموں//جموں و کشمیر کے ضلع سانبہ کے منسار علاقے میں بدھ کے روز مشتبہ نقل و حرکت کی اطلاع ملنے کے بعد سیکورٹی فورسز نے مشترکہ طور پر سرچ آپریشن شروع کر دیا ہے ۔ حکام کے مطابق مقامی لوگوں کی بروقت اطلاع کے بعد فورسز نے فوری کارروائی عمل میں لاتے ہوئے علاقے کو گھیرے میں لے لیا ہے ۔ ذرائع نے بتایا کہ ضلع سانبہ کے منسار کے قریب واقع ایک گاؤں کے باشندوں نے کچھ مشتبہ افراد کو علاقے میں گھومتے ہوئے دیکھا، جس کے بعد انہوں نے فوراً پولیس کو مطلع کیا۔ اطلاع ملتے ہی پولیس کی ایک ٹیم فوری طور پر جائے موقع پر پہنچی اور علاقے کو گھیرے میں لے کر تلاشی مہم کا آغاز کیا۔ ذرائع کے مطابق بعد ازاں اس آپریشن میں فوج اور سینٹرل ریزرو پولیس فورس کے اہلکار بھی شامل ہو گئے ، جس کے بعد تلاشی کارروائی کو مزید وسیع اور منظم کیا گیا۔ فورسز نے پورے علاقے میں سخت نگرانی قائم کرتے ہوئے داخلی اور خارجی راستوں کو سیل کر دیا ہے تاکہ کسی بھی مشتبہ شخص کے فرار کو روکا جا سکے ۔ حکام نے بتایا کہ منسار اور اس کے آس پاس کے علاقے میں گھنے جنگلات، زرعی زمینیں اور دیگر کھلے مقامات شامل ہیں، جہاں سیکورٹی فورسز کی جانب سے باریک بینی سے تلاشی لی جا رہی ہے ۔ حکام کے مطابق منسار کے ساتھ ساتھ ضلع کے دیگر حساس علاقوں میں بھی سیکورٹی الرٹ جاری کر دیا گیا ہے اور فورسز کو ہائی الرٹ پر رکھا گیا ہے تاکہ کسی بھی ممکنہ خطرے سے نمٹا جا سکے ۔ آپریشن کے دوران عام شہریوں کو محتاط رہنے اور سیکورٹی فورسز کے ساتھ تعاون کرنے کی ہدایت دی گئی ہے ۔ تاحال کسی بھی گرفتاری یا تصادم کی اطلاع نہیں ملی ہے ، جبکہ آپریشن جاری ہے ۔ حکام کا کہنا ہے کہ سرچ آپریشن مکمل ہونے کے بعد مزید تفصیلات فراہم کی جائیں گی۔ سیکورٹی فورسز نے واضح کیا ہے کہ خطے میں امن و امان کو برقرار رکھنے کے لیے ہر ممکن اقدام اٹھایا جا رہا ہے ۔
