بہار میں نئی حکومت کی تشکیل، نتیش کمار نے دسویں بار وزیر اعلیٰ کی حیثیت سے لیا حلف

عظمیٰ ویب ڈیسک
پٹنہ /بہار میں جے ڈی یو کے سربراہ نتیش کمار نے جمعرات کو ریاست کے وزیر اعلیٰ کے طور پر دسویں مرتبہ حلف لیا۔ حلف برادری کی یہ تقریب پٹنہ کے گاندھی میدان میں منعقد ہوئی،جہاں ریاست کے گورنر عارف محمد خان نے نتیش کمار سے حلف لیا۔ نتیش کمار بہار کے وزیر اعلیٰ کے طور پر دسویں بار حلف اٹھانے والے پہلے قائد بن کر ایک منفرد ریکارڈ قائم کر چکے ہیں۔نتیش کابینہ میں نائب وزیر اعلیٰ کے طور پر سامراٹ چودھری اور وجے کمار سنہا نے بھی حلف لیا۔
بی جے پی کے 14 اراکین اسمبلی نے وزراء کے طور پر حلف اٹھایا۔ حلف برداری کی اس پر وقار تقریب میں وزیر اعظم نریندر مودی، وزیر داخلہ امیت شاہ، جے پی نڈا، آندھرا پردیش کے وزیر اعلیٰ چندر ابابونائیڈو، یو پی کے وزیر اعلیٰ یوگی آدتیہ ناتھ، دہلی کی وزیراعلیٰ ریکھا گپتا، این ڈی اے کی زیر قیادت ریاستوں کے وزرائے اعلیٰ اور بی جے پی کے دیگر قائدین نے بھی شرکت کی۔