پاکستانی ڈرون سے گرائی گئی دو کروڑ روپے کی ہیروئن، بین الاقوامی سرحد کے قریب ضبط

عظمیٰ ویب ڈیسک
جموں/جموں و کشمیر کے ضلع کٹھوعہ میں منگل کو بین الاقوامی سرحد کے نزدیک بی ایس ایف اہلکاروں نے ایک زرد رنگ کے پیکٹ سے 500 گرام ہیروئن برآمد کر لی، جو پاکستانی ڈرون کے ذریعہ ہندوستانی حدود میں گرائی گئی تھی۔ برآمد شدہ منشیات کی بین الاقوامی مارکیٹ میں مالیت دو کروڑ روپے سے زائد بتائی جا رہی ہے۔
حکام نے بتایا کہ ہیرا نگر سیکٹر میں مشتبہ ڈرون کی نقل وحرکت کی اطلاع ملنے کے بعد بارڈر سیکیورٹی فورس (بی ایس ایف) نے فوری طور پر تلاشی آپریشن شروع کیا، جس کے نتیجے میں مذکورہ ہیروئن برآمد ہوئی۔ آخری اطلاعات تک علاقے میں تلاشی اور نگرانی کا عمل جاری تھا۔
یہ واقعہ ایسے وقت میں پیش آیا ہے جب صرف چار دن قبل، 26 جولائی کو سانبہ ضلع کے چلیاری سرحدی گاؤں میں بھی پولیس نے پاکستانی ڈرون کے ذریعہ گرائے گئے آدھا کلو ہیروئن کا پیکٹ برآمد کیا تھا۔ حکام کے مطابق یہ واقعات سرحد پار سے منشیات کی اسمگلنگ میں پاکستانی ڈرونز کے بڑھتے ہوئے استعمال کی عکاسی کرتے ہیں، جن کے خلاف سیکیورٹی فورسز نے نگرانی سخت کر دی ہے۔
بی ایس ایف نے مقامی لوگوں سے اپیل کی ہے کہ وہ کسی بھی مشتبہ نقل و حرکت یا مشکوک اشیاء کی فوری اطلاع متعلقہ حکام کو دیں، تاکہ منشیات اور دیگر غیر قانونی سرگرمیوں کے نیٹ ورک کو بروقت روکا جا سکے۔