مقید علیحدگی پسند رہنما شبیر احمد شاہ کی حالت مستحکم،مناسب طبی علاج حاصل کر رہے ہیں :جیل انتظامیہ

عظمیٰ ویب ڈیسک
سرینگر/تہاڑ جیل انتظامیہ نے جمعہ کو سوشل میڈیا پر زیر گردش ان افواہوں کو سختی سے مسترد کر دیا جن میں دعویٰ کیا گیا تھا کہ جیل میں قید علیحدگی پسند رہنما شبیراحمد شاہ کی طبیعت خراب ہو گئی ہے۔ حکام کا کہنا ہے کہ ان کی حالت مستحکم ہے اور وہ دہلی کے صفدرجنگ اسپتال میں مناسب طبی علاج حاصل کر رہے ہیں۔
حکام نے وضاحت کی کہ شبیراحمد شاہ، ولد غلام احمد شاہ، کو ضروری طبی سہولیات فراہم کی گئی ہیں اور 26 جون 2025 کو انہیں پیشاب کی نالی کے نچلے حصے سے متعلق علامات کے حوالے سے او پی ڈی مشورے کے لیے صفدرجنگ اسپتال بھیجا گیا تھا۔
بیان میں کہا گیاانہیں مزید ٹیسٹ اور معائنے کے لیے اسپتال میں داخل کیا گیا۔ ان کے تمام رپورٹس معمول کے مطابق آئی ہیں، اور انہیں مناسب طبی علاج فراہم کیا جا رہا ہے۔ تاہم دہلی جیل محکمہ نے بھی واضح کیا ہے کہ قیدی کی باقاعدگی سے نگرانی کی جا رہی ہے اور ان کی حالت غیرتشویشناک ہے۔شبیراحمد شاہ پر مختلف الزامات، بشمول ملی ٹینٹوں کی مالی معاونت، کے تحت مقدمات درج ہیں اور وہ کئی برسوںسے حراست میں ہیں۔