امید ہے کہ امسال بھی یاتری جوق در جوق آئیں گے: عمر عبداللہ

عظمیٰ ویب ڈیسک
سری نگر/جموں و کشمیر کے وزیر اعلیٰ عمر عبداللہ نے ہفتے کے روز کہا کہ نیشنل کانفرنس کے ارکان اسمبلی قابل ہیں اوروہ اپنا کام کر رہے ہیں۔ان کا کہنا ہےخواہ مخواہ ان کو بدنام کرنے کی کوشش کی جا رہی ہے، جو جیت کے آئے ہیں ان کو پہلے اپنا ریکارڈ کارڈ دکھانا چاہئے ہمارے ارکان اسمبلی اپنے وقت پر اپنا ریکارڈ کارڈ دکھائیں گے۔عمر عبداللہ نے یہ باتیں رکن پارلیمان آغا سید روح اللہ کے حالیہ ریمارکس کے جواب میں کیں جس میں انہوں نے جموں وکشمیر کی سیاست کی تنقید کی ہے۔
شری امرناتھ جی یاترا کے بارے میں پوچھے جانے پر انہوں نے کہاامید ہے کہ امسال بھی یاتری جوق در جوق آئیں گے اور درشن کرکے صحیح سلامت واپس جائیں گے۔ان کا کہنا تھاان کی سلامتی کی ذمہ داری راج بھون کو ہے امید ہے انہوں نے اس سلسلے میں تمام اقدام کئے ہوں گے باقی جو حکومت کو تیاریاں کرنی ہیں ان سب کو حتمی شکل دی گئی ہے۔
عمر عبداللہ نے کہامیں گاندربل کے لوگوں کا احسان مند ہوں کہ انہوں نے مجھے کامیاب کیا اسی لئے میں نے یہ سیٹ نہیں چھوڑی میں پورے جموں کشمیر اور یہاں کی ترقی کے لئے وعدہ بند ہوں یہاں ترقیاتی کاموں کا نیا جال بچھایا گیا ہےانہوں نے کہا کہ یہاں آنے کا سب سے بڑا فائدہ یہ ہوا کہ موقع پر لوگوں کو در پیش مشکلات کا پتہ چلا۔ایک سوال کے جواب میں ان کا کہنا تھاارکان اسمبلی پانچ برسوں کے لئے بنے ہیں اب یہاں نئے چہرے ہم کہاں سے لائیں گے۔