ڈنا کرناہ کے نزدیک سڑک حادثہ، محکمہ صحت کا ملازم جاں بحق، تین زخمی

اشفاق سعید
کرناہ // سادھنا ٹاپ کے نزدیک ڈنا کرناہ علاقے میں ایک افسوسناک سڑک حادثہ پیش آیا جس کے نتیجے میں محکمہ صحت سے وابستہ ایک ملازم جاں بحق ہو گیا جبکہ ان کی اہلیہ، بچہ اور ایک دیگر شہری شدید زخمی ہو گئے۔
ذرائع کے مطابق گاڑی ڈنا کرناہ کے مقام پر اچانک بے قابو ہو کر گہری کھائی میں جا گری، جس کے نتیجے میں محکمہ صحت کے ملازم رفیق احمد خان موقع پر ہی دم توڑ بیٹھے۔ حادثے میں ان کی اہلیہ، بچہ اور ایک دیگر شہری کو شدید چوٹیں آئیں جنہیں فوری طور پر ابتدائی طبی امداد فراہم کرنے کے بعد بہتر علاج کے لیے سرینگر منتقل کر دیا گیا ہے۔
ادھر جاں بحق ہونے والے رفیق احمد خان کی میت کو آبائی علاقہ کرناہ پہنچایا گیا، جہاں کہر آلود ماحول اور اشکبار آنکھوں کے ساتھ ان کی آخری رسومات انجام دی گئیں۔ حادثے پر علاقے میں رنج و غم کی لہر دوڑ گئی ہے اور لوگوں نے اہلِ خانہ سے گہرے رنج و غم کا اظہار کیا ہے۔پولیس نے واقعے کی نسبت کیس درج کر کے مزید کارروائی شروع کر دی ہے۔