عظمیٰ نیوز سروس
سرینگر//اپنی پارٹی نے ڈل جھیل میں رنگا رنگ شکارا ریلی کا اہتمام کیاجس کی قیادت پارٹی کے سربراہ الطاف بخاری نے کی ۔ریلی کا مقصد وادی میں سیاحتی شعبے کی بحالی کیلئے پیغام دینا تھا۔اس موقع پر صحافیوں سے بات کرتے ہوئے سید محمد الطاف بخاری نے کہا کہ شکارا ریلی کا مقصد ملک بھر میں یہ پیغام دینا ہے کہ کشمیر محفوظ ہے اورساتھ ہی ہم سیاحت کے شعبے کے اسٹیک ہولڈرز کے ساتھ اپنی یکجہتی کا اظہار کرنا چاہتے ہیں۔انہوں نے کہا، اس شکارا ریلی کے ذریعے ہم ملک بھر میں اپنے ان شہریوں ، جو بطور سیاح کشمیر آنا چاہتے ہیں، کو یہ پیغام دینا چاہتے ہیں کہ ہم آپ کا بے صبری سے انتظار کر رہے ہیں۔ ہم ہر ایک کو بتانا چاہتے ہیں کہ کشمیر بھی ملک کے دیگر حصوں کی طرح محفوظ ہے۔انہوں نے مزید کہا، اس کے علاوہ، ہم نے سیاحت کے شعبے کے تمام اسٹیک ہولڈر بشمول ہاس بوٹ مالکان، شکارا آپریٹرز، اور ہوٹل والوں کے ساتھ ساتھ ٹیمپو، ٹیکسی اور آٹو ڈرائیوروں کے ساتھ اپنی بھر پور یکجہتی کے اظہار کے لیے اس ریلی کا انعقاد کیا۔ یہ سب لوگ اس وقت یہاں کے حالات کی وجہ سے مایوس ہیں۔ ہم انہیں یقین دلانا چاہتے ہیں کہ اپنی پارٹی کے اس مشکل وقت میں ان کے ساتھ شانہ بہ شانہ کھڑی ہے۔ایک سوال کے جواب میں سید محمد الطاف بخاری نے حکومت پر زور دیا کہ وہ سیاحت کے اسٹیک ہولڈرز کی مدد کرنے کیلئے سامنے آئے۔انہوں نے کہا، حکومت کو سیاحتی شعبے سے جڑے لوگوں کی مدد کرنے کیلئے متحرک کردار ادا کرنا ہوگا۔ ان سٹیک ہولڈرز میں سے بہت سے لوگ ایسے بھی ہیں، جنہیں واقعی اس وقت حکومت کے تعاون اور مدد کی ضرورت ہے کیونکہ انہیں نے حد نقصان کا سامنا کرنا پڑا ہے۔اس شکارا ریلی کا اہتمام یاور دلاور میر کی سربراہی میں پارٹی کی یوتھ ونگ نے کیا تھا۔ اس موقع پر پارٹی کے متعدد لیڈران اور کارکنان موجود تھے۔
