پہلگام حملے کے بعد احتیاطی طور بند کی گئیں کئی پارکوں کو دوبارہ کھول دیا گیا

عظمیٰ ویب
سری نگر/جموں و کشمیر کے سیاحتی مقامات پر منگل کے روز کئی بند پارکوں کو سیاحوں کے لئے ایک بار پھر کھول دیا گیا۔ان پارکوں کو 22 اپریل کو پہلگام میں پیش آنے والے واقعے کے بعد احتیاطی طور پر بند کر دیا گیا تھا۔
ذرائع نے بتایا کہ حکومت کے اعلان کے مطابق جموں وکشمیر میں منگل کے روز سیاحتی مقامات پر کئی پارکوں کو سیاحوں کے لئے دوبارہ کھول دیا گیا۔انہوں نے کہا کہ پہلگام میں بھی کچھ پارکوں کو دو بارہ کھول دیا گیا۔
جموں و کشمیر کے لیفٹیننٹ گورنر منوج سنہا نے 3 روز قبل بند پارکوں کو مرحلہ وار طریقے سے کھولنے کا اعلان کیا تھا۔ان کا کہنا تھا کہ 17 جون سے پہلے مرحلے میں کچھ مقامات دوبارہ کھولے جائیں گے۔لیفٹیننٹ گورنر نے یہ بھی کہا کہ جموں خطے میں بھی آٹھ مقامات کو دوبارہ کھول دیا جائے گا۔
سنہا نے کہا تھاکٹھوعہ میں سارتھل اور دھگر ، دیوی پنڈی ، سیاد بابا اور ریاسی میں سولا پارک ، ڈوڈا میں گلدانڈا اور جئے ویلی ، اور ادھم پور میں پنچیری‘یہ سب جموں خطے میں ہیں‘کو بھی پہلے مرحلے میں دوبارہ کھولا جا رہا ہے۔ان کاکہنا تھاپہلے مرحلے میں آٹھ جگہیں دوبارہ کھولی جا رہی ہیں۔ اگلے مرحلے میں کچھ دیگر مقامات کو دوبارہ کھول دیا جائے گا۔
پارکوں کے دوبارہ کھلنے کا سیاحوں اور اسٹیک ہولڈرز نے استقبال کیا ہے۔حکام کے مطابق پارکوں میں سیکورٹی کے بہترین انتظامات کئے گئے ہیں تاکہ سیاحوں کو احساس تحفظ ہوسکے۔پنجاب سے تعلق رکھنے والی ایک خاتون سیاح نے میڈیا کو بتایامیں دو سال پہلے بھی کشمیر آئی تھی اس وقت بھی اچھا لگا اور آج بھی بہت اچھا لگ رہا ہے۔
انہوں نے کہا جو سوشل میڈیا یا میڈیا پر پرچار کیا جا رہا ہے اس سے یہاں صورتحال بالکل الگ ہے۔انہوں نے اپنے پیغام میں کہالوگوں سے میرا پیغام ہے کہ وہ یہاں آئیں کشمیر پہلے بھی جنت تھا، جنت ہے اور جنت رہے گا۔
قابل ذکر ہے کہ پہلگام میں 22 اپریل کو پیش آئے دہشت گردانہ حملے کے تقریباً دو ماہ بعد وادی میں شعبہ سیاحت بتدریج بحال ہو رہا ہے جس سے سیاحتی صنعت سے وابستہ افراد میں امید کی نئی کرن پیدا ہوئی ہے۔