مہاراشٹر اور کیرالہ میں شدید بارشوں سے تباہی | متعدد افراد جاں بحق، فصلوں اور تعمیرات کو نقصان

عظمیٰ نیوز سروس

نئی دہلی//مانسون کی شدید بارش سے کئی ریاستوں میں عام زندگی بری طرح متاثر ہوئی ہے۔ ایک طرف جہاں فصلوں کو بڑے پیمانے پر نقصان پہنچا ہے وہیں اس سے لوگوں کی جانیں بھی گئی ہیں۔ مہاراشٹر کے مراٹھواڑہ میں منگل کو شدید بارش کے درمیان 5 لوگوں کی موت ہو گئی۔ 4 لوگوں کی ڈوبنے سے جبکہ ایک دیگر کی کرنٹ لگنے سے جان چلی گئی۔کیرالہ میں 24 مئی کو مانسون کی دستک کے بعد سے ہو رہی مسلسل بارش سے ریاست میں برا حال ہے۔ یہاں بارش سے جڑے معاملوں میں 4 لوگوں کی موت ہو گئی۔ وہیں بارش اور لینڈ سلائیڈ کی وجہ سے 29 گھر منہدم ہو گئے جبکہ 868 گھروں کو نقصان پہنچا ہے۔ ٹرینیں تاخیر سے چل رہی ہیں اور نچلے علاقے زیر آب ہیں۔شمالی کیرالہ کے وائناڈ ضلع میں کئی گھر سیلاب کی زد میں ہیں۔ محکمہ موسمیات نے کوزی کوڈ، کنور اور وائناڈ میں ریڈ الرٹ جبکہ پتھان متھیٹا، کوٹایم، تریشور، پلکڑ جیسے کئی ضلعوں میں آرینج الرٹ جاری کیا ہے۔تمل ناڈو میں نیل گیری ضلع میں لگاتار تین دن سے جاری بارش سے 17 گھروں کو نقصان پہنچا ہے۔ یہاں 275 سے زیادہ لوگوں کو راحت کیمپوں میں شفٹ کیا گیا ہے۔ انتظامیہ کے ذریعہ بجلی اور پانی کی سپلائی بحال کرنے کی کوشش جا رہی ہے۔شدید بارش سے مہاراشٹر کے ناندیڑ اور بیڈ ضلعوں میں حالات سنگین ہیں۔ کئی علاقوں میں آبی جماو جیسے حالات پیدا ہو گئے ہیں۔ ممبئی میں ایک شخص کی موت پیڑ گرنے سے ہو گئی۔ افسروں کے مطابق نانڈیر ضلع کے ہڈ گاوں تحصیل میں بادل پھٹنے جیسے واقعات بھی پیش آئے۔ لاتور شہر میں بھی دو گھنٹے کی موسلادھار بارش سے کافی نقصان پہنچا ہے۔وہیں دہلی این سی آر میں بارش اور آندھی کے بعد موسم نے پھر کروٹ لے لی ہے۔ تیز دھوپ اور امس کی وجہ سے گرمی دوبارہ لوٹ آئی ہے۔ محکمہ موسمیات کا کہنا ہے کہ جمعرات کو بھی شدید گرمی بنی رہے گی جبکہ جمعہ کو رات سے آندھی اور بارش کے پھر سے لوٹنے کا امکان ہے۔