یو این آئی
نئی دہلی//مرکزی وزیر داخلہ امت شاہ نے کہا ہے کہ تین نئے فوجداری قوانین کے نفاذ سے زمینی سطح پر محکمہ پولیس کی کارکردگی اور ذمہ داری میں اضافہ ہوگا۔ شاہ نے پیر کو یہاں دہلی کے لیفٹیننٹ گورنر وی کے سکسینہ اور وزیر اعلیٰ ریکھا گپتا کے ساتھ قومی دارالحکومت میں تین نئے فوجداری قوانین کے نفاذ پر ایک جائزہ میٹنگ کی۔ اجلاس میں پولیس، جیل، عدالتوں، پراسیکیوشن اور فرانزک سے متعلق مختلف نئی دفعات کے نفاذ اور موجودہ صورتحال کا جائزہ لیا گیا۔وزارت داخلہ اور دہلی حکومت کے سینئر افسران بشمول مرکزی داخلہ سکریٹری، دہلی کے چیف سکریٹری، دہلی پولیس کمشنر، پولیس ریسرچ اینڈ ڈیولپمنٹ بیورو کے ڈائریکٹر جنرل، نیشنل کرائم ریکارڈ بیورو کے ڈائریکٹر میٹنگ میں موجود تھے۔ شاہ نے اس موقع پر کہا کہ تین نئے فوجداری قوانین کے نفاذ سے زمینی سطح پر محکمہ پولیس کی کارکردگی اور ذمہ داری میں اضافہ ہوگا۔ وزیر داخلہ نے نئے فوجداری قوانین پر عمل درآمد کو یقینی بنانے کے لیے افسران کی ذمہ داریاں طے کرنے کی ہدایت دی۔انہوں نے کہا کہ 60اور 90دنوں کے اندر چارج شیٹ داخل کرنے کے عمل کی مکمل اور مسلسل نگرانی کی جانی چاہئے اور اس وقت کی حد پر سختی سے عمل کیا جانا چاہئے۔ انہوں نے کہا کہ گھنانے جرائم کے مقدمات میں سزا کی موجودہ شرح کو کم از کم 20 فیصد تک بڑھانے کی کوشش کی جانی چاہئے۔مرکزی وزیر داخلہ نے کہا کہ ای سمن براہ راست عدالت سے بھیجے جائیں اور اس کی ایک کاپی مقامی پولیس اسٹیشن تک بھی پہنچ جائے۔ انہوں نے کہا کہ پراسیکیوشن ڈائریکٹوریٹ میں تقرری کے عمل کو تیز کیا جائے اور کسی بھی صورت میں اپیل کا فیصلہ پراسیکیوشن ڈائریکٹوریٹ ہی کرے۔
