محمد تسکین
بانہال// ضلع رامب ن میں تحصیل کھڑی کے سرکاری پرائمری سکول ناگن ڈار نیابت منگت کی چھت ٹینکی چادروں سمیت 2016میں تیز ہواؤں کی وجہ سے اُکھڑ گئی تھی لیکن تب سے اب تک نو سال کا طویل عرصہ گذرنے کے باوجود پرائمری سکول ناگن ڈار کی عمارت تعمیر نہ ہوسکی جس کی وجہ سے یہاں زیر تعلیم بچوں اور اساتذہ کو ناقابل بیان مشکلات کا سامنا ہے۔ یہ عمارت غیر محفوظ ہے اور مقامی لوگوں کا تنازعہ نئی بلڈنگ کی تعمیر میں آڑے آ رہی ہے۔ منگت علاقے کے سماجی و سیاسی کارکن عبد الجبار نے ناگن ڈار کے کئی والدین کے ہمراہ کشمیر عظمیٰ سے بات کرتے ہوئے کہا کہ پرائمری سکول ناگن ڈار میں 75طلباء اور طالبات زیر تعلیم ہیں اور ان کیلئے دو اساتذہ تعینات ہیں۔ انہوں نے کہا کہ اس سکول کی عمارت 2016میں طوفانی ہواؤں کی وجہ سے اکھڑ گئی تھی اور تب سے بارشوں اور برفباری کو جھیلتے جھیلتے دو کمروں پر مشتمل ناگن ڈار سکول غیر محفوظ ہوگیا اور اس کے ٹوٹے پھوٹے اور خستہ حال کمروں میں بچوں کو رکھنا خطرناک ہوسکتا ہے ۔ انہوں نے کہا کہ مقامی لوگوں نے یہاں تعینات اساتذہ کے ساتھ ملکر کر سکول کی اکھڑی چھت اور ٹین کی چادروں کو عارضی اس سکول پر رکھا ہو ہے لیکن محکمہ تعلیم کی طرف سے اس طرف کسی بھی قسم کی توجہ نہیں دی گئی۔ عبد الجبار نے کہا کہ سکول عمارت نہ ہونے کی وجہ سے بچوں کو سردی اور گرمی میں باہر کھلے میدان میں بیٹھنا پڑتا ہے اور بارشوں کے دنوں میں بچوں کو واپس گھر بھیجنے کے سوا کوئی چارہ نہیں رہتا ہے۔ انہوں نے کہا کہ پچھلی ایک دہائی سے غریب والدین اس صورتحال اور اپنے بچوں کے مستقبل سے پریشان ہیں اور یہ معاملہ ضلع حکام کی نوٹس کئی بار لانے کے باوجود تعلیمی حکام کی توجہ حاصل نہ کر سکا ہے۔ اس سلسلے میں بات کرنے پر زونل ایجوکیشن آفیسر کھڑی دیو راج نے کشمیر عظمیٰ کو بتایا کہ پرائمری سکول ناگن ڈار کی نئی عمارت مقامی لوگوں اور ٹھیکیدار کے درمیان تنازعہ کا شکار ہوئی ہے جس سے یہاں تعینات اساتذہ اور بچوں کو مشکلات کا سامنا ہے ۔ انہوں نے کہا کہ پرائمری سکول ناگن ڈار منگت کی نئی عمارت کیلئے پیسہ موجود ہے اور دو سال پہلے اس کے ٹینڈرز ہوئے اور ایک مقامی ٹھیکیدار کو سکول عمارت کا کام بھی الاٹ ہوا ۔ انہوں نے کہا کہ ٹھیکیدار کی طرف سے پلنتھ بنانے اور میٹریل پہنچانے کے بعد مقامی لوگوں نے ٹھیکیدار کو کام کرنے نہیں دیا اور سکول عمارت کی تعمیر تنازعہ کا شکار ہوگئی ۔ انہوں نے کہا کہ موجودہ خستہ حال سکول عمارت کو منہدم کرنے کا کچھ کام بھی ٹھیکیدار نے شروع کیا تھا لیکن لوگوں نے کام نہ چلنے دیا ۔انہوںنے مزید بتایا کہ وہ اس تنازعہ کو سلجھانے کیلئے چار پانچ بار منگت گئے مگر معاملہ حل نہیں ہوسکا ۔ انہوں نے کہا کہ اب چیف ایجوکیشن آفیسر رام بن نے ڈپٹی کمشنر رام بن سے درخواست کی کہ وہ پرائمری سکول ناگن ڈار کی عمارت کی تعمیر کیلئے دوبارہ ٹینڈر طلب کریں تاکہ سکول عمارت کو جلد از جلد مکمل کیا جاسکے ۔ انہوں نے کہا کہ امید ہے کہ آئندہ چند ہفتوں میں نئے سرے سے ٹینڈر کرکے اس سکول عمارت کی تعمیر کا کام شروع کیا جائیگا ۔
