عظمیٰ ویب ڈیسک
سری نگر/وادی کشمیر میں خشک و خوشگوار موسم کے بیچ محکمہ موسمیات نے 3 اپریل کو شمالی کشمیر کے پہاڑی علاقوں اور سونہ مرگ – زوجیلا ایکسز پر ہلکی برف باری کی پیش گوئی کی ہے۔
متعلقہ محکمے کے ایک ترجمان نے بتایا کہ وادی میں یکم اور 2 اپریل کو موسم مجموعی طور پر خشک رہنے کا امکان ہے۔ انہوں نے کہا کہ 3 اپریل کی دوپہر کو شمالی کشمیر کے پہاڑی علاقوں اور سونہ مرگ – زوجیلا ایکسز پر ہلکی برف باری متوقع ہے۔ ان کا کہنا ہے کہ 4 سے 7 اپریل تک وادی میں موسم خشک رہ سکتا ہے۔
موصوف ترجمان نے بتایا کہ بعد میں 8 اپریل کو ایک بار پھر شمالی کشمیر کے پہاڑی علاقوں اور سونہ مرگ میں ہلکی برف باری متوقع ہے۔
انہوں نے کہا کہ 9 اور 10 اپریل کو مطلع ابر آلود رہنے کے ساتھ وادی کے پہاڑی علاقوں میں ہلکی برف باری یا بارشوں کا امکان ہے اور اس دوران صوبہ جموں میں بھی کہیں کہیں ہلکی برف باری یا بارشیں ہوسکتی ہیں۔
محکمے نے اپنی ایڈوائزری میں مسافروں، سیاحوں اور ٹرانسپورٹروں سے کہا ہے کہ وہ ٹریفک ایڈوائزری پر عمل کریں۔ کسانوں سے کہا گیا ہے کہ وہ اپنے کھیت کھلیانوں میں آپریشنز جاری رکھیں۔
دریں اثنا وادی کے بیشتر حصوں میں شبانہ درجہ حرارت 1 سے 3 ڈگری سینٹی گریڈ معمول سے کم ریکارڈ ہوا ہے جبکہ جموں صوبے میں 1 سے 4 ڈگری سینٹی گریڈ معمول سے کم درج ہوا ہے۔
وادی میں سیاحتی مقام گلمرگ سرد ترین علاقہ رہا ہے جہاں کم سے کم درجہ حرارت منفی 0.4 ڈگری سینٹی گریڈ ریکارڈ ہوا ہے جبکہ صوبہ جموں میں بانہال سب سے سرد علاقہ رہا ہے جہاں شبانہ درجہ حرارت5.7 ڈگری سینٹی گریڈ ریکارڈ ہوا ہے۔
کشمیر میں اگلے 24 گھنٹوں کے دوران موسم خشک رہنے کا امکان
