سرنکوٹ میں الگ الگ سڑک حادثات ،تین افراد شدید زخمی

عشرت حسین بٹ
سرنکوٹ// ضلع پونچھ کی تحصیل سرنکوٹ میں ایک مسافر گاڑی اور موٹر سائیکل کے درمیان ٹکر ہوئی جس دوران موٹر سائیکل سوار شدید طور پر زخمی ہو گیا جسے سب ضلع ہسپتال سرنکوٹ سے ابتدائی علاج کے بعد گورنمنٹ میڈیکل کالج راجوری منتقل کیا گیا ۔
پولیس کے مطابق ایک مسافر گاڑی زیر نمبر JK 02DD 1789 جو کہ پونچھ کی طرف روانہ تھی سرنکوٹ بائی پاس مقام پر سامنے سے آ رہے ایک موٹر سائیکلسے ٹکرا گئی جس کی وجہ سے موٹر سائیکل سوار شدید طور پر زخمی ہو گیا جسے بعد ازاں مقامی لوگوں کی مدد سے سب ضلع ہسپتال سرنکوٹ لے جایا گیا جہاں سے ابتدائی علاج کے بعد مزید علاج کے لیے اسے گورنمنٹ میڈیکل کالج راجوری لے جایا گیا جہاں وہ زیرعلاج ہے۔
زخمی نوجوان کی شناخت ساحل بخاری ولد مختار حسین ساکن سنائی سرنکوٹ کے طور پر ہوئی ہے ۔دریں اثنا سرنکوٹ کے ہی علاقہ جڑوں والی گلی میں ایک موٹر سائیکل فوج کی گاڑی سے ٹکرا گیا جس پر سوار دو نوجوان شدید طور پر زخمی ہو گئے جنھیں بھی علاج کے لیے جی ایم سی راجوری منتقل کیا گیا ۔
پولیس کے مطابق زخمیوں کی شناخت ذیشان اور عارف ساکنان سرنکوٹ کے طور پر ہوئی ہے دونوں حادثات کے حوالے سے پولیس نے کیس درج کر تحقیقات شروع کر دی ہیں۔