عشرت حسین بٹ
پونچھ// ضلع ترقیاتی کمشنر پونچھ ویکاس کنڈل نے کہا ہے کہ تاریخی مغل شاہراہ کو دس اپریل سے ٹریفک آمد و رفت کے لیے کھولا جا سکتا ہےـ
اس سلسلے میں انہوں نے کشمیر عظمیٰ کے ساتھ ایک خصوصی گفتگو میں بات کرتے ہوئے کہا کہ محکمہ موسمیات کی جانب سے 29مارچ کو برف باری کی پیشن گوئی کی گئی ہے انہوں نے کہا کہ اگر 29مارچ کو موسم صاف رہتا ہے یا برف باری نہیں ہوتی ہے تو اس کے اگلے ہی دن تاریخی مغل شاہراہ سے برف ہٹانے کا کام شروع کیا جائے گا اور 9اپریل کو شاہراہ پر یکطرف ٹریفک کو ٹرائل دیا جائے گا اور دس اپریل کو شاہراہ کو دونوں اطراف سے کھول دیا جائے گاـ
کنڈل نے کہا کہ اس سلسلے میں مغل شاہراہ سے تعلق رکھنے والے تمام ذمہ داران کے ساتھ ایک اجلاس بھی منعقد کیا گیا جس دوران شاہراہ کے جلد ٹریفک قابل آمد و رفت پر غور خوض کیا گیاٰل
بتا دیں کہ مغل شاہراہ رواں سال جنوری میں نامسائد موسمی صورت اور شدید برف باری کی وجہ سے ٹریفک آمد و رفت کے لیے بند کی گئی تھی وہیں خطہ پیر پنچال کے لوگ بھی اس شاہراہ کو جلد کھولنے کی مانگ کر رہے ہیں ـ
