محمد تسکین
بانہال// شد بارشوں کے باوجود رام بن ۔ بانہال سیکٹر میں جموں سرینگر قومی شاہراہ مجموعی طور پر ٹریفک کی نقل وحرکت کیلئے بحال رہی البتہ رام بن کے مہاڑ اور کیفٹریا موڑ کے علاقے میں سڑک پر گر آئے ملبے کی صفائی اور سڑک پر پیدا ہونے جابجا کھڈوں کو بھرنے کیلئے ٹریفک پولیس کی طرف سے ایک گھنٹے تک ٹریفک کو معطل رکھنے کا وقفہ لیا گیا تاہم سڑک کو درست کرنے کے بعد دونوں طرف کے ٹریفک کو دوبارہ بحال کیا گیا ۔ایس ایس پی ٹریفک نیشنل ہائے وے روہت بسکوترا نے کشمیر عظمیٰ کو بتایا کہ مسلسل بارشوں کے نتیجے میں ہفتے کی صبح کیفٹریا موڑ اور مہاڑ کے درمیان سڑک پر بہت سارا ملبہ گر آیا تھا اور اس ملبہ کو سڑک سے صاف کرنے کیلئے ایک گھنٹے تک ٹریفک کا وقفہ لیکر دونوں طرف کے ٹریفک کو روک دینا پڑا لیا ۔ انہوں نے کہا کہ بعد میں نیشنل ہائے وے اتھارٹی آف انڈیا کی تعمیراتی کمپنیوں کی مشینری نے سڑک کو صاف کرکے اسے معمول کے ٹریفک کیلئے رواں کردیا اور یہ سلسلہ ہفتے کی شام تک جاری تھا ۔ انہوں نے کہا ہفتے کے روز شاہراہ پر مسافر گاڑیوں کو دونوں طرف کے ٹریفک میں جبکہ مال گاڑیوں کو سرینگر سے جموں کی طرف آنے کی اجازت ہے کیونکہ ڈھلواس اور مہاڑ سمیت چند ایک مقامات پر جموں سرینگر قومی شاہراہ یکطرفہ ٹریفک کے ہی قابل ہے اور اس سیکٹر میں فورلین شاہراہ کے جاری کام اور حالیہ بارشوں کی وجہ سے سڑک کی خراب حالت کے پیش نظر کئی مقامات یکطرفہ ٹریفک کے ہی قابل ہے۔
