عظمیٰ ویب ڈیسک
سری نگر/ محکمہ موسمیات نے وادی کشمیر میں 10 مارچ سے 4 دنوں کو محیط وسیع پیمانے پر ہلکی درجے کی برف باری اور بارشوں کی پیش گوئی کی ہے۔
متعلقہ محکمے کے ایک ترجمان نے بتایا کہ وادی میں اگلے 24 گھنٹوں کے دوران موسم مجموعی طور پر خشک رہنے کا امکان ہے۔
انہوں نے کہا کہ بعد میں 10 سے 14 مارچ تک وسیع پیمانے پر ہلکی برف باری یا بارشوں کا امکان ہے۔
موصوف ترجمان نے بتایا کہ 10 مارچ کو کشمیر میں وسیع پیمانے پر برف و باراں متوقع ہے جبکہ اس دن جموں صوبے میں کہیں کہیں ہلکی بارشیں ہوسکتی ہیں۔
دریں اثنا وادی میں شبانہ درجہ حرارت 1 سے 2 ڈگری سینٹی گریڈ معمول سے کم ریکارڈ ہوا ہے جبکہ جموں صوبے میں جموں کے بغیر شبانہ درجہ حرارت معمول کے مطابق ریکارڈ ہوا ہے۔
کشمیر میں سیاحتی مقام سونہ مرگ سرد ترین مقام رہا ہے جہاں شبانہ درجہ حرارت منفی7.3 ڈگری سینٹی گریڈ ریکارڈ ہوا ہے۔
وادی کے شہرہ آفاق سیاحتی مقام گلمرگ میں کم سے کم درجہ حرارت منفی4.5 ڈگری سینٹی گریڈ ریکارڈ کیا گیا جبکہ وادی کے دوسرے مشہور سیاحتی مقام پہلگام میں شبانہ درجہ حرارت منفی2.6 ڈگری سینٹی گریڈ ریکارڈ ہوا ہے۔
گرمائی دارلحکومت سری نگر میں کم سے کم درجہ حرارت1.6 ڈگری سینٹی گریڈ ریکارڈ کیا گیا۔
دریں اثنا وادی میں ہفتے کو صبح سے ہی دھوپ کھلی رہی جس سے لوگوں کو مختلف مقامات جیسے صحنوں، پارکوں اور دکان تھڑوں پر بیٹھے لطف اندوز ہوتے ہوئے دیکھا گیا۔
کشمیر میں اگلے 24 گھنٹوں کے دوران موسم خشک رہنے کا امکان، 10 مارچ سے موسم میں تبدیلی متوقع
