عمر عبداللہ کا اسمبلی اجلاس کے دوران آنجہانی منموہن سنگھ کو شاندار خراج

عظمیٰ ویب ڈیسک
سرینگر// وزیر اعلیٰ عمر عبداللہ نے اسمبلی کے بجٹ اجلاس سے اپنے خطاب میں تعزیتی ریفرنس کے دوران آنجہانی وزیر اعظم منموہن سنگھ کو شاندار خراج عقیدت پیش کیا۔
انہوں نے کہا: ‘منموہن سنگھ جی نے جموں و کشمیر میں امن قائم کرنے کے لیے بڑی کوششیں کیں’۔
عمر عبداللہ نے کہا: ‘منموہن سنگھ جی غیر منقسم ہندوستان میں پیدا ہوئے اور انہوں نے آکسفورڈ اور کیمبرج یونیورسٹیوں میں اعلیٰ تعلیم حاصل کی اورایک افسر اور وزیر خزانہ اور پھر وزیر اعظم کے طور پر شروعات کیں’۔
انہوں نے کہا: ‘جب وہ وزیر خزانہ بنے تو ہمارا ملک معاشی بحران سے گزر رہا تھا آج ہندوستان ایک بڑی معیشت ہے، آج پرائیویٹ سیکٹر ترقی کر رہا ہے کیونکہ لائسنس راج بند ہو گیا تھا اور وزیر اعظم کے طور پر انہوں نے اندرا آواس یوجنا کی پہل کی تھی’۔
وزیر اعلیٰ نے منموہن سنگھ کی الوداعی پریس کانفرنس کو یاد کرتے ہوئے کہا: ‘منموہن سنگھ نے اپنی آخری پریس کانفرنس میں کہا تھا، تاریخ عصر حاضر کے مقابلے میں میرے لیے بہتر فیصلہ کرے گی’۔
انہوں نے کہا کہ کہ تمام عالمی رہنما منموہن سنگھ جی کا احترام کرتے تھے۔
منموہن سنگھ کی عاجزی کے مظاہرہ کے ایک واقعے ذکر کرتے ہوئے عمر عبداللہ نے کہا: ‘مجھے یاد ہے کہ میں نے انہیں (منموہن کو) کسی معاملے پر ایک خط لکھا تھا اور میں نے اس معاملے پر ایک انٹرویو دیا تھا لیکن میں نے خط کا ذکر نہیں کیا، ایک مسئلہ تھا کہ پروٹوکول ٹوٹ گیا تھا، انہوں نے مجھے بلایا اور کہا کہ یہ ٹھیک نہیں ہے کیونکہ آپ نے پریس میں اس مسئلے پر بات کی ہے، میں نے ان کو بتایا کہ میں نے ایسا نہیں کیا،،، لیکن 15 منٹ کے بعد انہوں نے واپس کال کی اور معذرت ظاہر کی،،، وہ وزیراعظم تھے ایسا کرنے کی ان کو کوئی ضرورت نہیں تھی’۔
انہوں نے کہا: ‘ پاکستان کے سابق صدر جنرل پرویز مشرف اور منموہن سنگھ نے کشمیر ایشوکے حل میں اہم پیش رفت کی تھی’۔
آنجہانی منموہن سنگھ کے دور میں شروع کیے گئے بنیادی ڈھانچے کے منصوبوں پر روشنی ڈالتے ہوئے عبداللہ نے کہا: ‘ان کے دور میں ورکنگ گروپ بنائے گئے، اور کشمیری پنڈتوں کے لیے نوکریاں پیدا کی گئیں، اور وہ کشمیر واپس چلے گئے’۔
انہوں نے کہا کہ منموہن سنگھ نے جموں سری نگر قومی شاہراہ شروع کی آج ہم وزیر اعظم کے بانہال جانے والی ٹرین کا افتتاح کرنے کا انتظار کر رہے ہیں، یہ منموہن سنگھ کے دور میں شروع کی گئی تھی اورانہوں نے ہی دنیا کے سب سے اونچے ریلوے پل کا کام شروع کیا تھا’۔