عظمیٰ نیوزسروس
جموں//جموں وکشمیر کی سرمائی راجدھانی جموں کے گھومٹ علاقے میں ایک نوجوان کی لاش پرا سرار حالت میں برآمد کی گئی ۔اطلاعات کے مطابق جموں کے گھومٹ میں ہوٹل کمرے سے 22سالہ نوجوان کی لاش برآمد ہونے کے بعد پولیس نے تحقیقات شروع کی ہے۔ہوٹل کے منیجر ہوشیار سنگھ نے کہاکہ کل شام دس بجے دو نوجوان جسویر سنگھ اور سنجیو کمار ساکنان نوشہرا راجوری نے ہوٹل میں ٹھہرانے کی کی خاطر ایک کمرہ بک کیا۔انہوں نے کہاکہ نوجوانوں کے آدھار کارڈ اور دوسرے لوازمات پورے کرنے کے بعد انہیں کمرے کی چابی فراہم کی گئی۔منیجر کے مطابق جمعرات کی صبح جسویر سنگھ نامی 22سالہ نوجوان کی لاش پر اسرار حالت میں پائی گئی جس کے بعد پولیس ٹیم جائے موقع پر پہنچی۔ان کے مطابق لاش کو گورنمنٹ میڈیکل کالج جموں منتقل کیا گیا جہاں پر پوسٹ مارٹم کی کارروائی جاری ہے۔دریں اثنا پولیس نے معاملے کی نسبت کیس درج کرکے تحقیقات شروع کی ۔
