ڈوڈہ میں ڈرونز کے استعمال پر دو ماہ کے لیے پابندی عائد

عظمیٰ ویب ڈیسک
سرینگر//ضلع ڈوڈہ میں ڈرونز کے بے تحاشہ استعمال اور نقل و حمل پر دو ماہ کے لیے پابندی عائد کر دی گئی ہے۔ حکام کا کہنا ہے کہ یہ اقدام تخریبی عناصر کی جانب سے ان کے غلط استعمال کو روکنے کے لیے کیا گیا ہے۔
البتہ، پولیس اور دیگر سیکیورٹی ایجنسیوں کو اس پابندی سے مستثنیٰ قرار دیا گیا ہے، جبکہ سرکاری محکموں کو نقشہ سازی، سروے، تعمیراتی نگرانی اور زراعت جیسے مختلف کاموں کے لیے ڈرون کے استعمال کی اجازت لینے کی ہدایت دی گئی ہے۔
ایڈیشنل ضلع مجسٹریٹ ڈوڈہ نے کہا کہ جو لوگ پہلے سے ڈرون یا اس سے ملتے جلتے آلات رکھتے ہیں، وہ ایک ہفتے کے اندر انہیں قریبی پولیس اسٹیشن میں جمع کرائیں اور اس کے عوض باقاعدہ رسید حاصل کریں۔
حکم نامے میں کہا گیا ہے کہ حالیہ دنوں میں جموں و کشمیر کے کچھ علاقوں میں ایسے واقعات پیش آئے ہیں جہاں تخریبی عناصر نے ڈرونز اور دیگر اڑنے والے آلات کا استعمال کر کے نقصان، زخمی کرنے اور انسانی جانوں کو خطرے میں ڈالنے کے ساتھ ساتھ حساس تنصیبات کی سیکیورٹی کو خطرے میں ڈالا ہے۔
حکم نامے کے مطابق، حساس مقامات اور گنجان آبادی والے علاقوں کی فضائی حدود کو محفوظ بنانے کے لیے ڈرونز اور اسی طرح کے دیگر آلات کے ذخیرہ، خرید و فروخت، ملکیت، استعمال اور نقل و حمل پر معقول پابندیاں عائد کرنا ناگزیر ہو چکا ہے۔
حکم نامے میں مزید کہا گیا ہے کہ پولیس اور دفاعی فورسز کو ڈرونز کے استعمال میں استثنیٰ حاصل ہوگا، تاہم انہیں استعمال سے قبل متعلقہ اسٹیشن ہاؤس آفیسر (ایس ایچ او) کو مطلع کرنا ہوگا۔ ڈوڈہ کے سینئر سپرنٹنڈنٹ آف پولیس کو حکم نامے پر عمل درآمد یقینی بنانے کی ہدایت دی گئی ہے۔