ملازمین، پنشنروں کے مہنگائی بھتے میں اضافے کا اعلان

سرینگر// جموں و کشمیر حکومت نے اپنے ملازمین، پنشنرز اور فیملی پنشنرز کے لیے ڈیئرنس الاونس (مہنگائی بھتہ) میں اضافے کا فیصلہ کیا ہے، جو یکم جولائی 2024 سے نافذ العمل ہوگا۔ اس حوالے سے مالیاتی محکمہ نے دو سرکاری احکام جاری کیے ہیں۔
محکمہ مال کے ایک حکم نامہ کے مطابق، ساتویں تنخواہ کمیشن کی سفارشات کے تحت کام کرنے والے سرکاری ملازمین اب اپنے بنیادی تنخواہ پر 53 فیصد ڈیئرنس الاونس وصول کریں گے، جو پہلے 50 فیصد تھا۔
“بنیادی تنخواہ” سے مراد وہ تنخواہ ہے جو ساتویں تنخواہ کمیشن کی سفارشات کے مطابق پی میٹرکس کی مخصوص سطح پر دی جاتی ہے، جس میں خصوصی تنخواہ اور دیگر الاونس شامل نہیں ہیں۔
جولائی 2024 سے دسمبر 2024 تک کے اضافی ڈی اے کی قسط کا بقایا فروری 2025 میں ادا کیا جائے گا، جبکہ نظرثانی شدہ نرخ جنوری 2025 سے ملازمین کی ماہانہ تنخواہ کا حصہ بنیں گے۔
اسی طرح، پنشنرز اور فیملی پنشنرز کے لیے ڈیئرنس الاونس کو ان کی بنیادی پنشن یا بنیادی فیملی پنشن کا 53 فیصد کر دیا گیا ہے، جو پہلے 50 فیصد تھا۔
پنشنرز اور فیملی پنشنرز کے لیے اسی مدت کا بقایا فروری 2025 میں ادا کیا جائے گا، اور نظرثانی شدہ نرخ جنوری 2025 سے پنشنوں اور فیملی پنشنوں میں شامل کیے جائیں گے۔