یو این آئی
نئی دہلی//وزیر اعظم نریندر مودی نے ویر بال دیوس کے پروگرام میں حصہ لیا اور کہا کہ تاریخ سے لے کر آج تک نوجوانوں کی توانائی نے ہندوستان کی ترقی میں ہمیشہ بڑا رول ادا کیا ہے۔ مودی نے کہا کہ ان کی حکومت نے صاحبزادوں کی بے مثال بہادری اور قربانی کی یاد میں ویر بال دیوس شروع کیا ہے۔ انہوں نے کہا کہ یہ دن اب کروڑوں ہندوستانیوں کے لئے قومی تحریک کا تہوار بن گیا ہے۔ اس دن نے بہت سے بچوں اور نوجوانوں کو بے مثال ہمت کی ترغیب دی ہے۔وزیراعظم مودی نے بہادری، اختراع، سائنس اور ٹیکنالوجی، کھیل اور فنون کے شعبوں میں آج ویر بال ایوارڈز سے نوازے گئے 17 بچوں کی تعریف کی۔ انہوں نے کہا کہ آج کے ایوارڈ یافتگان ہندوستان کے بچوں اور نوجوانوں کی مختلف شعبوں میں بہترین کارکردگی کا مظاہرہ کرنے کی صلاحیت کو ظاہر کرتے ہیں۔اس موقع پر وزیر اعظم نے گرووں اور ویر صاحبزادوں کو خراج عقیدت پیش کیا اور ایوارڈ جیتنے والوں اور ان کے اہل خانہ کو بھی مبارکباد دی۔ انہوں نے بہادر صاحبزادوں کی قربانیوں کو یاد کرتے ہوئے کہا کہ آج کے نوجوانوں کو ان کی بہادری کی داستان جاننا ضروری ہے اس لیے ان واقعات کو یاد رکھنا بھی ضروری ہے۔ انہوں نے کہا کہ آج کے دن تین صدیاں قبل بہادر صاحبزادوں نے کم عمری میں اپنی جانوں کا نذرانہ پیش کیا تھا۔ انہوں نے کہا کہ صاحب زورآور سنگھ اور صاحب فتح سنگھ کی کم عمری کے باوجود ان کی ہمت کی کوئی حد نہیں تھی۔ انہوں نے کہا کہ صاحبزادوں نے مغلیہ سلطنت کے تمام فتنوں کو ٹھکرا دیا، تمام مظالم برداشت کیے اور وزیر خان کی طرف سے دی گئی سزائے موت کو پوری بہادری سے قبول کیا۔ انہوں نے کہا کہ صاحبزادوں نے انہیں گرو ارجن دیو، گرو تیغ بہادر اور گرو گوبند سنگھ کی بہادری کی یاد دلائی اور یہ بہادری ہمارے ایمان کی روحانی طاقت ہے۔ انہوں نے کہا کہ صاحبزادوں نے اپنی جانوں کا نذرانہ پیش کرنے کا انتخاب کیا لیکن کبھی بھی ایمان کی راہ سے نہیں ہٹے۔وزیر اعظم نے زور دے کر کہا کہ ویر بال دیوس ہمیں سکھاتا ہے کہ حالات کتنے ہی مشکل کیوں نہ ہوں، ملک اور قومی مفاد سے بڑی کوئی چیز نہیں ہے۔ انہوں نے کہا کہ ملک کے لیے کیا جانے والا ہر کام بہادری کا کام ہے اور ملک کے لیے جینے والا ہر بچہ اور نوجوان بہادر بچہ ہے۔ وزیر اعظم نے کہا اس سال کا ویر بال دیوس اور بھی خاص ہے کیونکہ یہ ہندوستانی جمہوریت اور ہمارے آئین کے قیام کا 75 واں سال ہے۔ انہوں نے زور دے کر کہا کہ ہندوستانی آئین کے اس 75 ویں سال میں ملک کا ہر شہری ملک کے اتحاد اور سالمیت کے لیے کام کرنے کے لیے بہادر صاحبزادوں سے تحریک لے رہا ہے۔ انہوں نے کہا کہ ملک کی مضبوط جمہوریت کو اس بات پر فخر ہے کہ یہ دن صاحبزادوں کی بہادری اور قربانیوں پر استوار ہے۔ انہوں نے اس بات پر زور دیا کہ ہماری جمہوریت ہمیں معاشرے کے آخری آدمی کی بہتری کی طرف لے جاتی ہے۔ مسٹر مودی نے کہا “آئین ہمیں سکھاتا ہے کہ ملک میں کوئی چھوٹا یا بڑا نہیں ہے‘‘۔وزیراعظم مودی نے کہا کہ ہماری جمہوریت کی گہرائی گرووں کی تعلیمات، صاحبزادوں کی قربانیوں اور قومی اتحاد کے منتر کی علامت ہے۔ مسٹر مودی نے کہا کہ ماضی سے لے کر آج تک نوجوانوں کی توانائی نے ہندوستان کی ترقی میں اہم کردار ادا کیا ہے۔ انہوں نے کہا کہ آزادی کی جدوجہد سے لے کر 21ویں صدی کی تحریکوں تک ہر انقلاب میں ہندوستانی نوجوانوں نے اہم رول ادا کیا ہے۔ مودی نے زور دے کر کہا کہ نوجوانوں کی طاقت کی وجہ سے ہی دنیا امید اور توقعات کے ساتھ ہندوستان کی طرف دیکھتی ہے۔ انہوں نے کہا کہ آج اسٹارٹ اپس سے لے کر سائنس تک، کھیلوں سے لے کر انٹرپرینیورشپ تک، نوجوان قوت نئے انقلابات کو جنم دے رہی ہے۔
