یو این آئی
نئی دہلی//وزیر اعظم نریندر مودی کو کویت کے امیر شیخ مشعل الاحمد الجابر الصباح نے اتوار کو کویت کے اعلی ترین قومی اعزاز ‘دی آرڈر آف مبارک الکبیر’ سے نوازا۔اس موقع پر کویت کے ولی عہد اور وزیراعظم شیخ احمد العبداللہ الاحمد الصباح بھی موجود تھے۔ مودی نے اس اعزاز کو ہندوستان اور کویت کے درمیان دیرینہ دوستی، کویت میں ہندوستانی برادری اور ہندوستان کے 1.4 بلین عوام کے نام وقف کیا۔تقریبا 43 سال بعد کسی ہندوستانی وزیر اعظم کے کویت کے تاریخی دورے پر اس اعزاز سے نوازا جانا اس موقع پر ایک خاص معنی رکھتا ہے۔ یہ اعزاز 1974 میں قائم کیا گیا تھا اور اس کے بعد سے یہ بل کلنٹن، پرنس چارلس اور جارج بش جیسے منتخب عالمی رہنماں کو دیا گیا ہے۔اس سے قبل وزیر اعظم نریندر مودی کا اتوار کو کویت سٹی کے بیان پیلس میں باضابطہ استقبال اور انہیں گارڈ آف آنر سے نوازا گیا۔کویتی قیادت کے ساتھ دو طرفہ بات چیت سے قبل مودی کا کویتی وزیر اعظم شیخ احمد عبداللہ الاحمد الصباح نے استقبال کیا گیا۔وزارت خارجہ کے ترجمان نے ایکس پر کہاکہ “وزیراعظم کا ان کے تاریخی دورے پر خصوصی استقبال! وزیر اعظم نریندر مودی کا بیان محل آمد پر رسمی استقبال اور گارڈ آف آنرپیش کیا گیا۔ کویت کے وزیر اعظم شیخ احمد عبداللہ الاحمد الصباح نے پرتپاک استقبال کیا۔ اس دوران ہز ہائینس دی امیر، ولی عہد اور وزیر اعظم کویت کے ساتھ وسیع بات چیت ہوگی۔”کویت کی طرف سے جاری کردہ ایک بیان کے مطابق کویتی اور ہندوستانی فریقوں نے دونوں دوست ممالک کے درمیان دو طرفہ تعلقات، عوام، مختلف شعبوں میں تعلقات کو فروغ دینے کے ذرائع، تعاون کی توسیع، مشترکہ تشویش کے اہم مسائل اور علاقائی اور بین الاقوامی سطح پر تازہ ترین پیش رفت پر تبادلہ خیال کیا گیا۔
۔ 71ہزار نومنتخب اہلکاروں کو تقررنامے فراہم کریں گے | ملک بھر میں 45مقامات پر | روزگار میلہ منعقد کیا جائے گا
یواین آئی
نئی دہلی//وزیر اعظم نریندر مودی پیر کے روزروزگار میلے میں مرکزی حکومت کے مختلف محکموں اور تنظیموں میں نئی تقرری حاصل کرنے والے اہلکاروں کو ورچوئل طور پر 71,000سے زیادہ تقرر ی نامے تقسیم کریں گے۔ وہ اس موقع پر حاضرین سے خطاب بھی کریں گے۔روزگار میلہ وزیر اعظم کی روزگار تخلیق کو اعلیٰ ترجیح دینے کے عزم کو پورا کرنے کی جانب ایک اہم قدم ہے۔ یہ نوجوانوں کو ملک کی تعمیر اور خود مختاری میں ان کی شراکت داری کے لیے موثر مواقع فراہم کرے گا۔روزگار میلہ ملک بھر میں 45مقامات پر منعقد کیا جائے گا۔ مرکزی حکومت کی مختلف وزارتوں اور محکموں کے لیے وقتا فوقتا بھرتیاں کی جا رہی ہیں۔ ملک بھر سے منتخب نئے اہلکار داخلہ کی وزارت، ڈاک کے محکمے، اعلی تعلیم کے محکمے، صحت و خاندانی بہبود کی وزارت، محکمہ مالیاتی کی خدمات سمیت مختلف وزارتوں اور محکموں میں تعینات کیے جائیں گے۔
