رئیس احمد کمار
نرگس اپنے بیٹے سراج کو روز کی طرح بس سٹاپ تک لے جارہی تھی جہاں سے وہ بس میں چڑھ کر اسکول کی طرف روانہ ہو رہا تھا ۔ لیکن آج انہوں نے راستے میں کچھ عجیب منظر دیکھا ۔ دو عورتیں آپس میں کسی بات پر توتو میں میں کررہی تھیں ۔ جھگڑا اس قدر شدت اختیار کرگیا کہ انہوں نے ایک دوسرے کے بال بھی نوچ لئے ۔ وہاں گویا گالیوں کی برسات ہورہی تھی اور دونوں عورتیں آپس میں ایک دوسرے کو طعنے دے رہی تھیں۔ وہاں موجود لوگوں کا جم غفیر جیسے کسی سنیما ہال میں کوئی ہِٹ فلم دیکھنے میں مگن تھا ۔۔۔۔
نرگس نے اپنے بیٹے کی انگلی پکڑ کر قدم آگے کی طرف بڑھائی اور سراج سے پوچھا ۔۔۔۔۔ بیٹا کیا آپ نے اس سے پہلے ایسی جنگ کبھی دیکھی ہے ؟
سراج ۔۔۔ اماں کیا بات کہہ رہی ہو ، میں ہر روز موبائل پر مولویوں کے درمیان اس سے کئی گنا بڑی لڑائیاں دیکھ رہا ہوں اور لڑائیاں دیکھتے دیکھتے موبائل ڑاٹا بھی ختم ہوجاتا ہے ۔
قاضی گنڈ کشمیر
