غیر قانونی کریشرز، کان کنی وزمین مافیا کیساتھ کوئی سمجھوتہ نہیں ہوگا: ڈاکٹر جتیندر
عظمیٰ نیوز سروس
کٹھوعہ//’غیر قانونی کرشر، غیر قانونی کان کنی، زمین پر ناجائز قبضہ کرنے والوں اور منشیات فروشوں سے نمٹنے میں کوئی سمجھوتہ نہیں کیا جائے گا‘‘جبکہ ملی ٹینسی سمیت دیگر نوعیت کی سماجی برائیوں میں ملوث افراد پر گہری نظر رکھی جارہی ہے ۔ان خیالات کا اظہار مرکزی وزیر مملکت (آزادانہ چارج) سائنس اور ٹیکنالوجی،ایٹمی توانائی اور خلائی ڈاکٹر جتیندر سنگھ نے کٹھوعہ میں ایک عوامی دربار کے بعد ذرائع ابلاغ کے نمائندوں سے بات چیت کے دوران کیا ۔انہوں نے کہاکہ غیر قانونی کرشر، غیر مجاز کان کنی یا زمین پر قبضے سے جڑے کسی کو بھی بخشا نہیں جائے گا۔وزیر نے کہا کہ کسی کو بھی غیر قانونی کان کنی میں ملوث ہونے اور کیدیاں گنڈیال جیسے قیمتی پلوں کی بنیادوں کو خاکستر کرنے کا حق نہیں ہے۔ انہوں نے کہا کہ اسی طرح کسی کو بھی یہ حق نہیں ہے کہ وہ دوسروں کے بچوں کو نشے کے عادی بنا کر ناجائز دولت کمائے۔ڈاکٹر جتیندر سنگھ تقریباً تین گھنٹے کے عوامی دربار کے انعقاد کے بعد بات کر رہے تھے، جس کے دوران وزیر نے مختلف شہریوں کے وفود کو سنا جس کا مقصد ڈپٹی کمشنر اور دیگر اعلیٰ حکام کے ساتھ ان کی شکایات اور مطالبات کے موقع پر حل کو یقینی بنانا تھا۔وزیر نے کہا کہ غیر قانونی کان کنی اور منشیات کا استعمال ایک شیطانی عمل ہے جو دہشت گردی اور دیگر سماجی برائیوں میں سہولت فراہم کرتا ہے۔ انہوں نے متنبہ کیا کہ ’’ان جرائم میں ملوث افراد کے خلاف مثالی اور تعزیری کارروائی کی جائے گی، چاہے ان کی سیاسی وابستگی یا نام نہاد اثر و رسوخ کچھ بھی ہو‘۔ ایسے تقریباً ایک درجن کرشرز کے خلاف قانون کے مطابق سخت کارروائی کرنے کی تیاری کی جا رہی ہے۔مرکزی وزیر نے یقین دلایا کہ لوگوں کا اعتماد بحال کرنے اور امن عامہ کی بحالی کے لئے ملی ٹینسی کے بڑھتے ہوئے واقعات سے نمٹنے کے لئے تمام ممکنہ اقدامات کئے جا رہے ہیں۔ انہوں نے کہا کہ یہ اقدامات جلد ہی ثمر آور ہوں گے اور ایک ہفتے کے اندر حالات معمول پر آجائیں گے۔مقامی ملی ٹینسی کے سہولت کاروں کو سخت کارروائی کا انتباہ دیتے ہوئے، ڈاکٹر جتیندر سنگھ نے معاشرے پر زور دیا کہ وہ چوکس رہیں اور خطے میں ملی ٹینسی کی لعنت سے نمٹنے کے لئے حکومت کی کوششوں میں شامل ہوں۔ انہوں نے کہا کہ ملی ٹینٹوں سے لڑنے کے لئے وی ڈی سی کو مضبوط کیا جا رہا ہے۔ڈاکٹر جتیندر سنگھ نے علاقے میں مویشیوں کی سمگلنگ کے بڑھتے ہوئے واقعات کی نشاندہی کرتے ہوئے اس جرم سے آہنی ہاتھوں سے نمٹنے کا عزم کیا۔ مرکزی وزیر نے اس بات پر افسوس کا اظہار کیا کہ منشیات کی لعنت نے پنجاب سے کٹرہ تک اپنی لپیٹ میں لے لیا ہے جس سے مقدس شہر کی بدنامی ہوئی ہے۔ انہوں نے مقامی شہریوں پر زور دیا کہ وہ اپنے مستقبل کو محفوظ بنانے کے لئے اپنے وارڈوں کو اس لعنت سے دور کریں۔ مرکزی وزیر نے زمین پر قبضے کے مسئلہ کی طرف بھی توجہ مبذول کرائی اور خبردار کیا کہ جرم میں قصوروار پائے جانے پر کسی کو بھی بخشا نہیں جائے گا۔
