عظمیٰ ویب ڈیسک

جموں// اودھم پور لوک سبھا حلقہ کے ریٹرننگ افسر نے جمعہ کو کٹھوعہ ضلع میں ایک پولنگ سٹیشن پر قطار میں کھڑے ہوکر اپنی باری کا انتظار کرنے کے بعد اپنے حق رائے دہی کا استعمال کیا۔
راکیش منہاس (34)، جو اصل میں پنجاب سے تعلق رکھتے ہیں، کٹھوعہ قصبے میں محکمہ آبپاشی میں قائم پولنگ سٹیشن پہنچے اور اپنی باری کا انتظار کرنے کے بعد اپنا حق رائے دہی استعمال کیا۔
راکیش منہاس اور ان کی اہلیہ سلونی رائے، دونوں 2016 بیچ کے آئی اے ایس افسران ہیں، دونوں کو اگست 2022 میں جموں و کشمیر میں تعینات کیا گیا تھا، اور بعد میں انہیں کٹھوعہ اور اودھم پور اضلاع کے ڈپٹی کمشنر کے طور پر تعینات کیا گیا تھا۔
اودھم پور پارلیمانی سیٹ پر پولنگ جاری ہے، جو اودھم پور، کٹھوعہ، ڈوڈہ، کشتواڑ اور رام بن، پانچ اضلاع میں پھیلی ہوئی ہے، جس میں 12 امیدواروں کی انتخابی قسمت آزما رہے ہیں، امیدواروں میں مرکزی وزیر جتیندر سنگھ، کانگریس امیدوار اور دو بار کے سابق ایم پی چودھری لال سنگھ اور ڈی پی اے پی امیدوار اور جموں و کشمیر کے سابق وزیر جی ایم سروڑی بھی شامل ہیں۔
بعد ازاں منہاس نے اپنی شہادت کی انگلی دکھائی جس پر انمٹ سیاہی لگی ہوئی تھی اور حلقے میں ٹرن آوٹ کے رجحان پر اپنے اطمینان کا اظہار کیا۔
منہاس نے کہا، “ہمیں اپنے جمہوری حقوق سے لاپرواہ نہیں ہونا چاہیے۔ یہاں تک کہ اگر قطار لگتی ہے، تو ووٹ ڈالنے میں صرف 15 سے 20 منٹ لگتے ہیں”۔
اُنہوں نے کہا، “میری ووٹروں سے اپیل ہے کہ وہ بڑی تعداد میں باہر آئیں اور اپنا جمہوری حق پورا کریں۔ ووٹنگ صبح 7 بجے شروع ہوئی اور شام 7 بجے تک جاری رہے گی“۔
انہوں نے کہا کہ خاص طور پر کشتواڑ میں صبح کے خراب موسم کا ووٹنگ پر کوئی اثر نہیں ہوا، جو آسانی سے جاری ہے۔