عظمیٰ ویب ڈیسک

جموں//ضلع مجسٹریٹ سچن کمار ویشیا کی قیادت میں ایک سکریننگ کمیٹی نے 4914 اسلحہ لائسنسوں کی جانچ پڑتال کی ہے اور لوک سبھا کے عام انتخابات کے پرامن انعقاد کو یقینی بنانے کیلئے اُنہیں اپنے ہتھیار جمع کرنے کی ہدایت دی ہے۔
اس سلسلے میں ڈی ایم کی طرف سے ایک حکم جاری کیا گیا ہے اور سینئر سپرنٹنڈنٹ آف پولیس کو بھی حکم پر عمل درآمد کو یقینی بنانے کے لیے کہا گیا ہے۔
حکم نامہ میں کہا گیا ہے کہ اسلحہ/ہتھیار 7 دنوں کے اندر جمع کرائے جائیں اور متعلقہ ایس ایچ او لائسنس ہولڈرز کو ضلع مجسٹریٹ کے حکم کی تعمیل کیلئے فوری طور پر مطلع کریں۔
یہ لائسنس ہولڈرز درج میں شامل زمرہ جات کے تحت آتے ہیں۔
الف) ضمانت پر رہا ہونے والے افراد کا اسلحہ لائسنس
ب) مجرمانہ جرائم والے افراد کا اسلحہ لائسنس
ج) کسی بھی وقت بلکہ خاص طور پر الیکشن کے دوران ہنگامہ آرائی میں ملوث افراد کا اسلحہ لائسنس
د) دوسرے لائسنس ہولڈرز جو انتخابی عمل میں خلل ڈالنے کی صلاحیت رکھتے ہوں
لائسنس ہولڈرز کی فہرست میڈیا میں بھی شائع کی جائے گی اور ایس ایس پی، ایس ڈی ایم، تحصیلداروں اور پولیس تھانوں کے دفتر میں آویزاں کی جائے گی۔