عظمیٰ نیوز سروس
جموں//سی آر پی ایف کی 76ویں بٹالین نے جموں و کشمیر کے محکمہ صحت کے تعاون سے گرو روی داس کمیونٹی ہال چھنی راما میں سوک ایکشن پروگرام کے تحت ایک مفت طبی کیمپ کا انعقاد کیا۔صحت کیمپ کا انعقاد سندیپ کھیروار، آئی پی ایس آئی جی جموں سیکٹر اور رمیش کمار، ڈی آئی جی جموں رینج کی رہنمائی میں کیا گیا۔ کیمپ کا بنیادی مقصد علاقے کے ضرورت مند لوگوں تک مفت صحت کی سہولیات فراہم کرنا اور انہیں ان کی صحت کے بارے میں آگاہی فراہم کرنا تھا۔کیمپ میں میڈیکل آفیسر ڈاکٹر ایس سومیا، 76 بٹالین، سی آر پی ایف اور ڈاکٹر نیاتی ابرول نے تقریباً 300 شہریوں کا مفت طبی معائنہ کیا اور مفت ادویات فراہم کیں۔کمانڈنٹسی آر پی ایف نے سوک ایکشن پروگرام کا افتتاح کیا اور علاقے کے تمام لوگوں سے اپیل کی کہ وہ فٹ رہنے کے لئے باقاعدگی سے جسمانی ورزش کریں۔ انہوں نے انہیں صحت مند طرز زندگی اور حفظان صحت کے بارے میں آگاہ کیا۔
