عظمیٰ نیوز سروس

جموں// جموں شہر کے مضافات میں سدھرا نروال شاہراہ کے نزدیک ایک ٹفن باکس ٹائمر پر مبنی دیسی ساختہ دھماکہ خیز ڈیوائس (آئی ای ڈی) برآمد کیا گیا۔
پولیس ترجمان نے بتایا کہ سنیچر کی شام تقریباً 5 بج کر 30 منٹ پر پولیس کو علاقے میں ایک مشکوک شئے کے بارے میں اطلاع ملی جو شاہراہ کے سدھرا-نروال حصے پر پولیس چیک پوائنٹ کے قریب پڑی تھی۔ انہوں نے بتایا کہ اطلاع ملتے ہی پولیس کی ایک ٹیم جموں ڈاگ سکواڈ کے ساتھ موقع پر پہنچی۔
پولیس کے ترجمان نے کہا، “مشتبہ مواد کی تلاش پر، علاقے میں 2 کلو وزنی ایک ٹفن باکس ٹائمر پر مبنی آئی ای ڈی پایا گیا”۔
انہوں نے مزید کہا ، “آئی ای ڈی کو ناکارہ بنا دیا گیا ہے اور متعلقہ تھانے میں قانون کی متعلقہ دفعات کے تحت مقدمہ درج کر لیا گیا ہے”۔ انہوں نے مزید کہا کہ اس سلسلے میں مزید تفتیش جاری ہے۔