عظمیٰ ویب ڈیسک

جموں// جموں و کشمیر کے لیفٹیننٹ گورنر منوج سنہا نے پیر کو کہا کہ مرکز کے زیر انتظام جموں و کشمیر میں سیکورٹی کی صورتحال میں نمایاں بہتری آئی ہے اور دہشت گردی “اپنی آخری سانسیں لے رہی ہے”۔
انہوں نے کہا کہ کشمیری پنڈت برادری سے تعلق رکھنے والے ملازمین کو رہائش کی ضروریات کے لیے وادی میں سستے داموں زمینیں فراہم کی جائیں گی۔
سنہا نے جموں شہر کے مضافات میں ماتا بھدرکالی کے مندر پر کشمیری پنڈتوں سے خطاب کرتے ہوئے کہا،”سیکیورٹی صورتحال ماضی کے مقابلے میں بہتر ہے۔ اعتماد کے ساتھ، میں کہہ سکتا ہوں کہ دہشت گردی اپنی آخری سانسیں لے رہی ہے“۔
سنہا نے کہا کہ ماضی میں دہشت گردوں نے پنڈت برادری کے اندر خوف پیدا کرنے کے لیے ان کے مقامات کو نشانہ بنایا۔
اُنہوں نے کہا،”پڑوسی ملک جان بوجھ کر جموں و کشمیر میں دہشت گردی کے برتن کو ابلتا رکھنے کی کوشش کر رہا ہے۔ ہم کشمیری پنڈتوں اور اقلیتوں سمیت کمزور گروہوں کی حفاظت کو یقینی بنانے کی ہر ممکن کوشش کر رہے ہیں۔ پولیس اور سیکورٹی فورسز اس مقصد کے لیے انتھک محنت کر رہے ہیں“۔
سنہا نے کہا کہ کشمیری پنڈت برادری کے سرکاری ملازمین کو رہائش کے مقاصد کے لیے سری نگر میں رعایتی نرخوں پر زمین کی پیشکش کی جائے گی۔
اُنہوں نے کہا،”ہم یقینی بنائیں گے کہ یہ انتظام فوری طور پر کیا جائے۔ میری انتظامیہ اور دفتر کمیونٹی کے لوگوں کے لیے ان کے حقیقی تحفظات کو دور کرنے کے لیے کھلا ہے“۔
ایل جی نے کہا کہ کشمیر بھر میں ان رہائش گاہوں پر سیکورٹی کے بہتر اقدامات نافذ کیے جائیں گے۔
انہوں نے مزید کہا کہ وزارت داخلہ کو ایک تجویز پیش کی گئی ہے اور ہمیں فوری جواب کی توقع ہے جس کے نتیجے میں اس پر عمل درآمد ہو گا۔