عظمیٰ نیوز سروس
سرینگر//محکمہ ماہی پروری نے جنوبی کشمیر کے ضلع اننت ناگ میں اخروٹ چھلنے والی خودکار مشینوں کی تنصیب کو فوری طور پر روکنے کا حکم دیا ہے، جس میں ان مشینوں سے پیدا ہونے والی اخروٹ کے چھلکوں کے عرق سے متعلق ماحولیاتی کیلئے خدشات پیدا ہوگئے ہیں۔اننت ناگ ضلع کے ڈپٹی ڈائریکٹر ماہی پروری نے ایک سرکیولر جاری کیا ہے جس میں تمام محکموں کے سرکل انچارجوں کو ہدایت کی گئی ہے کہ وہ اپنے دائرہ اختیار میں اخروٹ چھلنے والی مشین آپریٹرز کے کام کو روکے۔
ان آپریٹرز کو مزید ضروری کارروائیوں کے لیے بدھ 27 ستمبرتک محکمہ کے دفتر میں حاضر ہونے کے لیے نوٹس جاری کیے گئے ہیں۔یہ فیصلہ ضلع بھر میں پانی کے ذرائع کے قریب نصب اخروٹ چھیلنے والی خودکار مشینوں کی ایک قابل ذکر تعداد کی دریافت کی وجہ سے کیا گیا، جن میں سبز بھوسی کے عرق کو ٹھکانے لگانے کے لیے مناسب انتظامات نہیں تھے۔ ان عرقوں میں ممکنہ طور پر نقصان دہ کیمیکل ہوتے ہیں جو پانی کے ساتھ مل جانے سے آلودگی کا خطرہ لاحق کرتے ہیں اور آبی حیات کو نقصان پہنچاتے ہیں۔محکمے نے پایا کہ آپریٹرز سبز بھوسی کے عرقوں کے لیے درست ٹھکانے لگانے کے طریقہ کار پر عمل کرنے میں ناکام رہے ہیں اور انہوں نے متعلقہ سرکاری محکموں سے مطلوبہ No Object Certificates (NoCs) حاصل نہیں کیے تھے۔حال ہی میں ڈلسیر وحدان میں پیش آنے والے ایک سانحے کی وجہ سے صورتحال کی نزاکت مزید بڑھ گئی ہے جہاں ٹراوٹ یونٹس کے لیے ایک اہم ذریعہ کے طور پر کام کرنے والے ایک ندی میں پانی کی آلودگی کی وجہ سے تقریباً 20 لاکھ مالیت کی ٹراوٹ مچھلیاں ہلاک ہوگئیں۔ محکمہ کا کہنا ہے کہ آلودگی کے نتیجے میں اخروٹ کی سبز بھوسی کے عرق ندی کے پانی کے ساتھ ملانے سے یہ واقعہ پیش آیا ہے، جس کے نتیجے میں علاقے کی آبی زندگی کے لیے تباہ کن نتائج برآمد ہوئے۔
