وانِہامہ بیروہ کے غریب کنبے کی خوشیاں چلی گئیں

 سرینگر//شادی کے 6ماہ قبل ہی فورسز اہلکاروں نے 25سالہ شاہینہ دختر غلام احمد پرے ساکن وانی ہامہ کوگولی کا نشانہ بناکر نہ صرف شدید زخمی کردیا ہے بلکہ شاہینہ اور اسکی بہن کے دلہن بننے کے خواب کو فی الحال چکنا چو ر کردیا ہے ۔ فورسز اہلکاروں نے اتوار کو پولنگ کے روزشاہینہ کے گھر میں گھس کر اس پر گولی چلائی۔ فورسز اہلکاروں کی طرف سے چلائی گئی گولی سیدھے شاہینہ کی بائیں ران میں جالگی جس سے وہ شدید زخمی ہوگئی۔شدید زخمی شاہینہ کو بون اینڈ جوائنٹ اسپتال پہنچایا گیا جہاں ڈاکٹروں کا کہنا ہے کہ گولی سے شاہینہ کی ران کی ہڈی کو شدید نقصان پہنچا ہے۔وانی ہامہ بیروہ کے ایک غریب گھرانے سے تعلق رکھنے والی شاہینہ اور اسکی بڑی بہن محفومہ کی شادی امسال ستمبر کے مہینے میں مقرر تھی اور گھر میں خوشیوں کے آنے کی دستک سنائی دینے لگی تھی لیکن فورسز اہلکاروں نے ان کی خوشیوں پر پانی پھیر دیا ہے۔جواں سال شاہینہ بائیں ران میں گولی لگنے کی وجہ سے کمر کے بل لیٹنے پر مجبور ہوگئی ہے کیوںکہ گولی سے اسکی بائیں ٹانگ کی ران کی ہڈی کو شدید نقصان پہنچاہے۔بیروہ میں پیش آئے واقعہ کے بارے میں شاہینہ نے بتایا ’’ہماری بھابی حاملہ ہے اور میں اسکی دیکھ بال کیلئے اس کے کمرے میں ہی بیٹھی تھی اور چند کمسن بچے ہمارے گھر کے قریب سے جانے والی گلی میں نعرہ بازی کررہے تھے ۔ شاہینہ نے  بتایا ’’ میرا والد کسان ہے او ر میرے والد کو میرے علاوہ 5بیٹیوں اور ایک چھوٹے بیٹے کی پرورش کرنی پڑتی ہے جن میں بڑی بیٹی محفومہ، ستارہ، رخسانہ، شوبی اور شانی شامل ہیں‘‘۔شاہینہ نے کہا ’’ کیونکہ ہم غریب گھر سے تعلق رکھتے ہیں اسلئے گھر کی دیواربندی ممکن نہ ہوسکی ہے‘‘۔ شاہینہ نے بتایا ’’ بھابی کے کمرے سے نعرہ بازی کرنے والے کمسن بچوں پر سیدھے نظر پڑرہی تھی اور فورسز اہلکاروں نے جوں ہی بچوں کا تعاقب کرنا شروع کردیا تو چند بچے ہمارے گھر کے صحن سے فرار ہوئے اور فورسز اہلکار انکا تعاقب کرتے ہوئے ہمارے گھر کے اندر داخل ہوئے اور تو ڑ پھوڑ کرنے لگے ، خود کو خطرے میں پاتے ہی میں نے جان بچانے کیلئے گھر کی کھڑکی سے باہر آنے کی کوشش کی تاہم فورسز اہلکاوں نے دیکھتے ہی میری ٹانگ پر گولی مار دی جو سیدھے میری بائیں ران پر جالگی‘‘۔ شاہینہ نے بتایا ’’گولی لگتے ہی میں بے ہوش ہوگئی اور پھر کیا ہوا مجھے کچھ معلوم نہیں ہے‘‘۔ 25سالہ شاہینہ نے مزید بتایا ’’ میںسوزن کاری کے ذریعے ہی شادی کیلئے چھوٹا موٹا سامان جمع کرتی تھی مگر اب کئی ماہ تک اسپتال میں زیر علاج رہنا ہوگا جس کا تمام خرچہ میرے غریب والد کو ہی اٹھانا پڑے گا‘‘۔ بون اینڈ جوائنٹ اسپتال میں ڈاکٹروں کا کہنا ہے کہ شاہینہ کی بائیں ران کی ہڈی کو گولی لگنے سے شدید نقصان پہنچاہے جس کے علاج و معالجے کیلئے کافی وقت درکا ہے۔ شاہینہ کے والد غلام احمد پرے نے کہا ’’ والد کا سب سے بڑا خواب یہی ہوتا ہے کہ بیٹی کی جلد شادی ہو اور محنت مزدوری کرکے میں نے بیٹیوں کی شادی کا سامان جمع کردیا تھا مگر اتوار کی صورتحال اور دلہن بننے والی بیٹی کو اسپتال کے بستر پر دیکھ کر زار زار رونے کا دل کر رہا ہے۔