سنندا پشکر قتل معاملہ: تھرور کو ملی پیشگی ضمانت

 نئی دہلی//دارالحکومت کی پٹیالہ ہاؤس عدالت نے سابق مرکزی وزیر اور کانگریس لیڈر ششی تھرور کو اپنی اہلیہ سنندا پشکر کے قتل کے معاملہ میں پیشگی ضمانت دے دی۔خصوصی عدالت کے جج اروند کمار نے بدھ کو سماعت مکمل کرنے کے بعد فیصلہ محفوظ رکھ لیا تھا۔ تھرور کو ایک لاکھ روپے کی ضمانت اور عدالت کی اجازت کے بغیر بیرون ملک نہ جانے کی شرط پر ضمانت دی گئی ہے ۔ دہلی پولیس نے سماعت کے دوران تھرور کی ضمانت کی مخالفت کی تھی۔ پولیس کی دلیل تھی کہ تھرور بااثر شخص ہیں اور وہ گواہوں کو متاثر کر سکتے ہیں۔ اس کے علاوہ پولیس نے ان کے بیرون ملک جانے کا اندیشہ بھی ظاہر کیا تھا۔ سنندا پشکر 17 جنوری 2014 کو ایک فائیو اسٹار ہوٹل میں مشتبہ حالات میں مردہ پائی گئی تھیں۔ تھرور پر سنندا پشکر قتل معاملہ میں دفعہ 306 اور 498 کے تحت مقدمہ چل رہا ہے ۔یو این آئی