نئی دہلی//وزیر اعظم نریندر مودی نے امریکہ کے نو منتخب صدر جوزف بائیڈن سے ٹیلی فون پر بات کرکے انھیں مبارکباد دی ہے۔
مودی نے امریکی صدر منتخب ہونے پر بائیڈن کو گرمجوشی کے ساتھ مبارکباد دی اور کہا کہ اس الیکشن سے امریکی جمہوری روایات کے استحکام کا پتہ چلتا ہے۔
وزیر اعظم نے امریکہ کی نو منتخب نائب صدر سینیٹر کملا ہیرس کو بھی مبارکباد دی اور نیک خواہشات پیش کیے۔
دوران گفتگو مودی نے 2014 اور 2016 کے اپنے امریکی دورے کا ذکر کرتے ہوئے بائیڈن کے ساتھ اپنی ملاقات کو بھی یاد کیا۔
دونوں رہنماوں نے مشترکہ اقدار اور یکساں مفادات پر مبنی ہندوستان۔امریکہ عالمی اسٹریٹجک شراکت داری کو مزید مستحکم کرنے کے لیے کام کرنے پر اتفاق رائے ظاہر کیا۔
انہوں نے کووِڈ۔19 سے نمٹنے کے لیے کفایتی ویکسین مہیا کروانے، موسمیاتی تبدیلی کے چیلنج سے نمٹنے اور بحر الکاہل کے خطے میں تعاون میں اضافہ کرنے جیسی ترجیحات کے بارے بات چیت کی۔
