سرینگر // شوپیان ضلع کے راولپورہ گاوں میں جنگجوﺅں اور فورسز کے مابین سنیچر سے جاری معرکہ آرائی کے دوران پیر کوجیش کمانڈر جاں بحق ہوگیا۔جیش کمانڈر ولایت حمید، عرف سجاد افغانی کے جاں بحق ہونے کی اطلاع انسپکٹر جنرل پولیس، کشمیر رینج وجے کمار نے دی۔
اس معرکہ آرائی میں ابھی تک دو جنگجو جاں بحق ہوگئے ہیں۔گذشتہ روز ایک جنگجو جاں بحق ہوگیا تھا جس کی شناخت جہانگیر احمد ساکن ناڑہ پورہ ، شوپیان کے طور ہوئی تھی جبکہ آج ولایت عرف سجاد جاں بحق ہوگیا۔سجاد کے بارے میں معلوم ہوا ہے کہ وہ بھی ایک مقامی جنگجو تھا۔
آئی جی کشمیر نے ایک ٹویٹ کے ذریعے شوپیان پولیس اور فورسز کو سجاد افغانی کو جاں بحق کرنے پر مبارکباد دی۔
اس سے قبل راولپورہ شوپیان کا انکاونٹر تیسرے دن میں داخل ہوگیا جب آج صبح ایک معرکہ آرائی کے مقام پر جنگجوﺅں اور فورسز کے مابین گولیوں کا تبادلہ شروع ہوگیا۔
قابل ذکر ہے کہ اس معرکہ آرائی میں کم سے کم تین رہا ئشی مکان بھی تباہ ہوگئے جبکہ پولیس اور مظاہرین کے بیچ جھڑپوں میں پولیس اہلکار سمیت 5 افراد زخمی ہوگئے ۔
یہ معرکہ آرائی سنیچر کو اس وقت شروع ہوگئی جب فوج، پولیس اور سی آر پی ایف نے جنگجوﺅں کی موجودگی کی اطلاع ملنے کے بعد گاوں کو محاصرے میں لیکر تلاشی آپریشن شروع کیا۔
طرفین میں گولیوں کے تبادلے کا سلسلہ اتوار کی صبح تک جاری رہا جس کے نتیجے میں ایک عسکریت پسند جاں بحق ہوگیا۔اطلاعات کے مطابق کل زیادہ وقت خاموشی کے ساتھ گذر گیا اور طرفین میں کوئی زیادہ گولی باری نہیں ہوئی ۔
