محکمہ بجلی نے کشتواڑ کی دور دراز بستیوں کو روشن کیا | پتھ گام ، بنگام ، چناب ڈنڈو ، وٹسر کو اَب گرڈ کے ذریعہ بجلی فراہم

کشتواڑ// جموں و کشمیر کے ہر کونے تک بجلی کی معتبر اور معیاری فراہمی کے عزم کے ساتھ محکمہ پاور ڈیولپمنٹ نے حال ہی میں ضلع کشتواڑ کی مزید چاررہائش گاہوں کو کامیابی کے ساتھ بجلی کے گرڈ سے منسلک کیا ہے۔ ڈپٹی کمشنر کشتواڑ اشوک شرما نے مقامی باشندوں کی موجودگی میں دیہات کو صد فیصد بجلی کا باقاعدہ طور پر اعلان کیا۔اب یہ چار رہائش گاہ جو گرڈ کے ساتھ منسلک ہیں ان میں ضلع کشتواڑ کے پہاڑی سب ڈویژن چٹرو کے پتھ گام ، بن گام ، ڈنڈو اور وٹسر شامل ہیں۔ یہ تمام دیہات ایک مشکل خطہ میں واقع ہیں اور سردیوں کے دوران شدید برف باری ہوتی ہے جس کی وجہ سے وہ عملی طور پر ناقابل رسائی ہیں۔اس ترقی پر بات کرتے ہوئے واٹسر آبادی کے اَجے طالب علم نے کہاکہ ہم اپنی زندگی میں بجلی لانے کے لئے مرکز ، جموں و کشمیر حکومت اور بالخصوص بجلی محکمہ کا شکرگزار ہیں۔ بن گام کے ایک اور مقامی شہری نے بھی اپنے دیہات کو گرڈ سے منسلک کرنے کی کوششوں پر حکومت کا شکریہ ادا کیا۔ ہمیں خوشی ہے کہ ہمارے گاؤں اب بجلی کی فراہمی حاصل کر رہے ہیں اور ہمارے بچے بجلی کی دستیابی سے آسانی سے تعلیم حاصل کرسکتے ہیں ، انہوں نے مزید کہا کہ اس سے قبل محکمہ بجلی نے ہمارے دیہاتوں کو ڈی جی سیٹ فراہم کئے تھے لیکن بجلی کی فراہمی بہت محدود تھی۔چاروں بستیوں کے بجلی کے منصوبے کو مکمل کرنے کے لئے پاور ڈیولپمنٹ کو بجلی کا نیا بنیادی ڈھانچہ بنانا تھا جس میں ہر بستی میں 25 کے وی اے صلاحیت کے ڈسٹری بیوشن ٹرانسفارمر اور تقریباً  13.5کلومیٹر ایچ ٹی لائن اور 3.3 کلومیٹر ایل ٹی لائن لگ بھگ 60.32 لاکھ روپے لاگت آئے گی۔امسال کے شروع میں جموں و کشمیر کے پہاڑی ڈوڈہ ضلع کے گانوری۔تانٹا گاؤں کے دیہاتیوں نے پہلی بار بجلی کے بلب کی روشنی دیکھی جب پاور کارپوریشن نے اپنی زندگی میں اندھیروں کی دہائیوں کو روکنے کے لئے گرڈ میں توسیع کی۔ لیفٹیننٹ گورنر منوج سنہا کے حکم پر گاؤں میں بجلی کی فراہمی کا کام شروع کیا گیا۔کپواڑہ اور کشتواڑ کے دور دراز علاقوں میں مشکل خطہ ہے اور اسی طرح کے چیلنجوں کا سامنا ہے جبکہ ایک کشمیر میں ایل او سی کے بہت قریب واقع ہے۔ کشتواڑ کے مضافاتی علاقے پہاڑی ہیں اور سردیوں میں شدید برف باری کا سامنا کرنا پڑتا ہے اور ان میں سے بیشتر حصوں کے لئے یہ ناقابل رسائی ہے۔