ٹریفک قوانین کی پاسداری | سرینگرمیں مہم شروع،متعدد ڈرائیوروںکا چالان

 

سری نگر//ڈپٹی کمشنر سری نگر محمد اعجاز اسد نے بدھ کو شہر میں ٹریفک کی بھیڑ میں اہم کردار ادا کرنے والے مسائل کی نشاندہی کرنے کی مہم کے دوران کہا کہ پارکنگ کی جگہوں، سڑک کی چوڑائی یا دیگر بنیادی ڈھانچے کی کمی نہیں ہے بلکہ شہری احساس کی کمی ہے۔ صحافیوں سے بات کرتے ہوئے ڈی سی سری نگر نے کہا کہ آج کی مہم میں محکمہ ٹریفک کو دیگر محکموں بشمول مال،سرینگر میونسپل کارپوریشن سرینگر ڈیولپمنٹ اتھارٹی نے تعاون فراہم کیا۔ انہوں نے کہا کہ عوام کی جانب سے موصول ہونے والی ٹریفک جام کی شکایات کے پیش نظر سری نگر میں یہ مہم چلائی گئی۔ڈپٹی کمشنر سری نگر محمداعجاز اسد نے ڈرائیوروں کو متنبہ کرتے ہوئے کہا کہ اب بہانہ بازی نہیں چلے گی بلکہ خاطی ڈرائیوروں کے خلاف قانون کے مطابق کارروائی عمل میں لائی جائے گی۔ محمداعجاز اسد نے بتایا کہ عوام الناس کی جانب سے شکایات موصول ہونے کے بعد لالچوک، ریگل چوک، ڈلگیٹ اور جہانگیر چوک میں ٹریفک قوانین پر عمل نہ کرنے والے ڈرائیوروں کے خلاف چالان کاٹے گئے۔انہوں نے کہا کہ گاڑیوں کی پارکنگ کیلئے سری نگر میں مخصوص مقامات کی نشاندہی کی گئی ہے لیکن اس کے باوجود بھی مسافر بردار گاڑیوں کے ڈرائیور شاہراہوں کے بیچوں بیچ گاڑیاں کھڑی کر رہے ہیں جس وجہ سے بدترین ٹریفک جام کے مناظر دیکھنے کو ملتے ہیں۔ڈپٹی کمشنر محمداعجاز اسد کاکہناتھاکہ ڈلگیٹ میں ایس پی ٹریفک نے تین گاڑیوں پر جرمانہ عائد کیا کیونکہ انہوں نے بیچ شاہراہ پر گاڑیاں کھڑی کی ہوئی تھیں۔ضلع ترقیاتی کمشنرنے کہاکہ اب بہانہ بازی نہیں چلے گی بلکہ ڈرائیوروں کو ٹریفک قوانین پر من وعن عمل کرنی ہوگی اگر ایسا نہیں کیا تو اْن کے خلاف سخت سے سخت کارروائی عمل میں لائی جائے گی۔شام کے وقت اکثر روٹوں پر مسافر بردار گاڑیاں غائب ہونے کے بارے میں پوچھے گئے سوال کے جواب میں ڈپٹی کمشنر نے کہا کہ اس حوالے سے اقدامات اْٹھائے جارہے ہیں

 

سرینگر// سب ڈسٹرکٹ ویلیو ایشن کمیٹی کی طرف سے تجویز کردہ سال 2022 کے لیے سٹیمپ ڈیوٹی کی شرح پر نظر ثانی کرنے کیلئے ڈپٹی کمشنر سری نگر محمد اعجاز اسد، جو ڈسٹرکٹ ویلیو ایشن کمیٹی (ڈی وی سی) کے چیئرمین بھی ہیں، نے صدارت کی۔اس موقع پر سری نگر میونسپل کارپوریشن کے کمشنر اطہر امین خان بھی موجود تھے۔میٹنگ میں محکمہ مال کے حکام نے ڈپٹی کمشنرکو بتایا کہ اسٹامپ ڈیوٹی کے نرخوں کا تجزیہ کیا گیا ہے اور سال 2022 میں علاقوں کے حساب سے شامل کی جانے والی تبدیلیوں کی شرح فیصد کے بارے میں بتایا۔ڈپٹی کمشنر نے افسران سے کہا کہ وہ شرح کے تعین کے لیے طے شدہ معیار کے پیش نظر تجویز پر نظرثانی کریں اور کووڈ-19 وبائی امراض کی وجہ سے پیدا ہونے والے حالات کو بھی مدنظر رکھیں۔ڈی سی نے متعلقہ افسران کو ہدایت دی کہ وہ ضلع سری نگر میں سٹیمپ ڈیوٹی کو حتمی شکل دینے کے لیے شرح کے ڈھانچے کی علاقہ وار درجہ بندی کے لیے مشق کریں۔میٹنگ میں ایڈیشنل ڈپٹی کمشنر سری نگر، ڈاکٹر سید حنیف بلخی، ایس ڈی ایم ایسٹ، اویس مشتاق، اسسٹنٹ کمشنر ریونیو، رئیس احمد، اے سی آر، نازول (کلیکٹر پی ڈبلیو ڈی)، سندیپ بالی، ضلع پنچایت افسر، ڈویڑنل فارسٹ آفیسر اور ڈی آئی سی کے افسران نے شرکت کی۔