سرینگر// جنوبی کشمیر کے سب ضلع ترال کے سنگرامہ علاقے میں جمعہ کی صبح ایک ریچھ کو زندہ پکڑ لیا گیا ۔محکمہ وائلڈ لائف کے ایک اہلکار مظفراحمد نے بتایا کہ سنگرامہ ترال میں ایک ریچھ نے کھوکھلے چنار کے تنے میں پناہ لی تھی جس کو بے ہوش کرنے کے بعد محفوظ جگہ منتقل کیا گیا ۔ادھر مقامی لوگوں نے بتایا کہ کھوکھلے چنار کے تنے میں جنگلی جانوروں کی جانب سے پناہ لینا اب معمول بن گیا ہے جس کی وجہ سے وہ ذہنی کوفت کا شکار ہو گئے ہیں۔مقامی لوگوں نے اعلیٰ حکام سے اس چنار کو کاٹنے کا مطالبہ کیا ہے ۔قابل ذکر ہے کہ وادی کشمیر میں جنگلی جانوروں کا آبادی والے علاقوں میں گھومنا پھرنا ایک معمول سا بن گیا ہے ۔وادی کے کئی علاقوں میں جنگلی جانوروں خاص کر تیندئوں نے لوگوں کو جانی ومالی نقصان سے بھی دو چار کر دیا۔لوگوں کا کہنا ہے کہ جنگلی جانور اب بالائی علاقوں تک ہی محدود نہیں رہ گئے ہیں بلکہ میدانی علاقوں میں بھی نمودار ہونے لگے ہیں جس سے وادی میں خوف و ہراس پھیل گیا ہے ۔ماہرین کا کہنا ہے کہ جنگلوں کی کٹائی اور وہاں مناسب خوراک اور پناہ کی عدم دستیابی جنگلی جانوروں کے بستیوں کی طرف رخ کرنے کی بنیادی وجہ ہے۔
سنگرامہ ترال میں ریچھ زندہ پکڑ لیا گیا
