بارہمولہ اور بڈگام میں چار منشیات فروش گرفتار :پولیس

عظمیٰ ویب ڈیسک
سری نگر/کشمیر پولیس نے منشیات کا کاروبار کرنے والوں کے خلاف اپنی مہم جاری رکھتے ہوئے بارہمولہ اور بڈگام میں چار منشیات فروشوں کو گرفتارکرکے ان کے قبضے سے ممنوعہ نشیلی اشیاء ضبط کی ہیں۔پولیس کے ایک ترجمان نے بتایا کہ کانٹھ باغ بارہ مولہ میں ناکہ چیکنگ کے دوران پولیس نے دو افراد کو دھر دبوچ کر ان کے قبضے سے سو گرام چرس جیسی نشیلی اشیاءبرآمد کی ۔
پولیس نے گرفتار شدگان کی شناخت جاوید احمد شیخ ولد عبدالمجید شیخ اور سمیر احمد شیخ ولد ایم سبحان شیخ ساکنان خواجہ باغ بارہ مولہ کے بطور کی ہے۔دریں اثنا پولیس اسٹیشن خانصاحب کی ایک پارٹی نے بگرو کراسنگ پر ایک ناکے کے دوران سکوٹی زیر رجسٹریشن نمبرJK04 -5815 پر سوار ایک مشکوک شخص کو دیکھا جس نے پولیس کو دیکھ کر فرار ہونے کی کوشش کی تاہم اس کو موقع پر ہی دھر لیا گیا۔
انہوں نے کہا کہ تلاشی کے دوران اس کی تحویل سے ہیرائن جیسا مواد بر آمد کیا گا جس کے بعد اس کی گرفتاری عمل میں لائی گئی۔گرفتار شدہ کی شناخت عادل شوکت خان شوکت احمد خان ساکن نلسر محلہ واوورہ بارہمولہ حال اوم پورہ بڈگام کے طور پر کی گئی ہے۔
پولیس ترجمان نے بتایا کہ جرم میں استعمال کی جانے والی سکوٹی کو بھی ضبط کیا گیا۔انہوں نے کہا کہ اس ضمن میں پولیس اسٹیشن خانصاحب میں این ڈی پی ایس ایکٹ کے تحت ایک کیس درج کرکے مزید تحقیقات شروع کی گئیں۔