عظمیٰ نیوز سروس
مالدہ// بدھ کی دیر رات، مغربی بنگال کے مالدہ میں پولیس کو کالی چک 2 بی ڈی او آفس سے ایس آئی آر کے عمل میں شامل تین خواتین سمیت سات عدالتی افسران کو بچانا پڑا۔ اطلاعات کے مطابق آئندہ ریاستی اسمبلی انتخابات کے لیے ووٹر لسٹ سے ان کے ناموں کو حذف کرنے کے خلاف احتجاج کرنے والے مقامی لوگوں نے انہیں نو گھنٹے تک دفتر میں یرغمال بنائے رکھا۔عہدیداروں نے بتایا کہ بدھ کے روز دوپہر کے قریب کچھ لوگوں نے کالی چک 2 بی ڈی او آفس کے باہر احتجاج کرنا شروع کیا اور شکایت کی کہ ایس آئی آر کے عمل کے دوران ان کے نام حذف کردیے گئے ہیں۔
انتظامی ذرائع کے مطابق احتجاج کا سلسلہ رات گئے تک جاری رہا۔ پولیس نے آخر کار آدھی رات کے قریب عدالتی افسران کو بچا لیا۔ چیف الیکٹورل آفیسر کے دفتر نے اب حال ہی میں تعینات مغربی بنگال کے قائم مقام ڈائریکٹر جنرل آف پولیس سدھناتھ گپتا سے واقعہ کی رپورٹ طلب کی ہے۔ضلعی انتظامیہ کے حکام نے بتایا کہ مظاہرین نے ابتدائی طور پر عدالتی افسران سے ملاقات کا مطالبہ کیا۔ داخلے سے انکار پر، انہوں نے شام 4 بجے کے قریب اپنا احتجاج شروع کیا، پورے بی ڈی او آفس کمپلیکس کا گھیراؤ کیا۔ سرکاری ذرائع نے تصدیق کی کہ احتجاج کے دوران دفتر کے اندر پھنس جانے والوں میں تین خواتین جوڈیشل افسران بھی شامل تھیں۔ الیکشن کمیشن نے واقعے پر شدید برہمی کا اظہار کیا ہے۔ریاست کے چیف الیکٹورل آفیسر (سی ای او) کے دفتر کے ایک اہلکار نے بتایا کہ اعلیٰ حکام کو اس واقعہ کی اطلاع دے دی گئی ہے۔
