نرسوں کا عالمی دن | ڈاک نے شعبہ صحت کی ریڑھ کی ہڈی قرار دیا

سرینگر //نرسوں کے عالمی دن کے موقع پر ڈاکٹرس ایسوسی ایشن کشمیر نے کہا ہے کہ اس عالمی وبائی صورتحال میں نرسوں نے جس طرح سے کام کیا ہے وہ قابل سراہنا ہے اور پوری انسانیت مرہون منت ہے ۔ڈاک صدر ڈاکٹر نثار الحسن نے کہا کہ وہ ابتداء سے انتھک محنت کر رہی ہیں۔انہوں نے کہا کہ وہ چوبیس گھنٹے محنت کر رہی ہیں اور اپنے آپ کو خطرے میں ڈال کرفرائض انجام دیتی ہیں۔ڈاکٹرنثارالحسن نے کہا خاموشی سے کام کرنے والی نرسیں کووڈ مریضوں کی دیکھ بھال کر رہی ہیں اور ان کے لواحقین کو تسلی دے رہی ہیں۔انہوں نے کہا کہ مناسب کھانے کی سہولیات اور شفٹ اوقات کے بغیر وہ دن رات کام کررہی ہیں ۔ ڈاکٹر نثار نے کہا کہ نرسیں اور دیگر طبی عملہ انتہائی سخت حالات میں کام کر رہے ہیں اور جو سامان وہ پہنتے ہیں وہ بہت ہی تکلیف دہ ہے۔انہوں نے کہا کہ ان کی مہربانی ، شفقت اور ہمدردی نے بہت سارے مریضوں کی زندگیوں میںسدھار لایا ہے ۔ڈاک کے صدر نے کہا نرسنگ عملہ صحت کے شعبے کی ریڑھ کی ہڈی ہے۔انہوں نے کہا ہم اپنی نرسوں کی جانب سے اپنے فرائض منصبی میں دکھائے جانے والے لگن اور پیشہ ورانہ مہارت کے پابند ہیں۔انہوںنے کہا’’ میں ان میں سے ہر ایک کو ان کی محنت اور لگن کے لئے شکریہ اور سلام پیش کرتا ہوں‘‘۔12 مئی پوری دنیا میں ایک خاص اہمیت کا حامل ہے کیونکہ یہ برطانوی معاشرتی اصلاح پسند ، فلورنس نائٹنگل کی یوم پیدائش کے موقع پر منایا جاتا ہے ، جسے جدید نرسنگ کا بانی بھی کہا جاتا ہے۔1965 کے بعد سے عالمی یوم نرسوں کے دن کے طور پر منایا جاتا ہے ، اس دن نے پوری دنیا میں نرسوں کے ذریعہ کئے گئے انسان دوست کاموں کی تعریف کی ہے۔تاہم اس سال اس دن کی اہمیت انتہائی اہم ہے کیونکہ نرسوں اور طبی برادری دنیا میں مہلک کورون وائرس وبائی امراض کا شکار ہونے کے خلاف امید کی کرن بن چکی ہے۔